ދިވެހިން ހިޔާރުކުރާ ބޭންކުގެ ގޮތުގައި ބޭންކް އޮފް މޯލްޑިވްސް ދެމިއޮންނާނެކަމުގައި އެބޭންކުގެ ސީއީއޯ އަދި މެނޭޖިންގ ޑައިރެކްޓަރ ކާރލް ސްޓުމްކަ ވިދާޅުވެއްޖެއެވެ.
ބޭންކް އޮފް މޯލްޑިވްސްގެ އަހަރީ އާންމު ޖަލްސާގައި ވާހަކަދައްކަވަމުން ކަރލް ވަނީ، ބޭންކުގެ ކުރިމަގުގެ ތަސައްވަރު އަދި ސްޓްރެޓަޖީގައި އިސްކަންދޭ ތިން އަމާޒުކަމުގައިވާ ކަސްޓަމަރުންނާ އިންސާފުން މުއާމަލާތްކުރުމަށާއި ޑިޖިޓަލައިޒޭޝަނާއި ދެމެހެއްޓެނެވި ގޮތެއްގައި ވިޔަފާރި ހިންގުމަށް އަލިއަޅުވާލާފައެވެ.
ބޭންކިންގެ ދާއިރާއަށް ވާދަވެރިން އަންނާނެކަށް ގަބޫލުކުރައްވާކަން ފާހަގަކުރައްވާ ކަރލް ވިދާޅުވީ، އެއީ ހުއްޓުވޭނެކަމެއްވެސް ނޫންކަމަށެވެ. ނަމަވެސް ބީއެމްއެލްއިން މަސައްކަތް ކުރަމުންދާނީ ރާއްޖޭގައި އެންމެން އިހުތިޔާރު ކުރާ ބޭންކަށްވުމަށްކަމަށް އޭނަ ވިދާޅުވިއެވެ.
ރާއްޖޭގެ މާކެޓްގައި ބީއެމްއެލްއަށް ލިބިފައިވާ ކުރިއެރުމާއެކު މަސައްކަތް އިތުރަށް ފުޅާކޮށް، އިތުރު އާމްދަނީ ހޯދުމަށް ބޭރުގެ މާކެޓްތަކާއި އައު މަގުތައް ހޯދަންޖެހޭކަމަށް ކަރލް ވިދާޅުވިއެެވެ. ބީއެމްއެލްގެ ކާމިޔާބު މިނިގެންދާނީ ކަސްޓަމަރުން ބޭންކިންގ މުއާމަލާތް ކުރަންޖެހޭ ބައެއްގެ ގޮތުގައި އޮތް އޮތުން ބަދަލުކޮށް ބޭންކިންގ މުއާމަލާތް ކުރަން އެދޭ ބަޔަކަށް ބަދަލުކޮށްގެންކަމަށް އޭނަ ވިދާޅުވިއެވެ.
ޑިޖިޓަލައިޒޭޝަން އާ ގުޅޭގޮތުން ކަރލް ވިދާޅުވީ މި ދާއިރާއިން ބީއެމްއެލްއިން ކުރިއެރުން ހޯދާފައިވީ ނަމަވެސް ޑިޖިޓަލް ދަތުރު ހުއްޓާނުލާ ކުރިޔަށްގެންދަން ޖެހޭކަމަށެވެ. ހެދޭ ކުށްތައް މަދުވެ، ހިދުމަތުގެ ފެންވަރު ރަނގަޅުވެ، ބޭންކުގެ ހިދުމަތް ހޯދާނެ ގޮތާއި، ތަނާއި ވަގުތު ކަސްޓަމަރުންގެ އަތްމައްޗަށް ދޫކޮށްލުމަށްޓަކައި ފުރިހަމަގޮތުގައި އޮޓަމޭޓްކުރަން ޖެހޭކަން އޭނަ ފާހަގަކުރެއްވިއެވެ. ކަރލް ވިދާޅުވީ، ބީއެމްއެލްއިން މަސައްކަތް ކުރަނީ މިހާރު މެނުއަލްކޮށް މަސައްކަތް ކުރަމުންދާ ގިނަ ޕްރޮޑަކްޓްތަކާއި ހިދުމަތްތަކަށް ބަދަލުގެނެސް ހަމަ މިދަނޑިވަޅުގައި އިތުރު ސެކިއުރިޓީ ކޮންޓްރޯލް އިތުރުކޮށް ޑިޖިޓަލް ސަޕޯޓް ޕްލެޓްފޯމްތައް އިތުރުކުރަމަށްކަމަށެވެ.
ބޭންކުގެ ސްޓްރެޓަޖީ ގައި ހިމެނޭ ދެމެހެއްޓެނިވި މަސައްކަތްތަކަށް އަލިއަޅުވާލަމުން ކާރލް ވަނީ އެންވައިރަމަންޓަލް، ސޯޝަލް އެންޑް ގަވަރނަންސް (އީއެސްޖީ) ގެ މަސައްކަތްތަކުގައި އިސް ސަފުގައި މަސައްކަތްކުރުމުގެ މުހިންމުކަން ފާހަގަކޮށްފައެވެ.
ބީއެމްއެލްގެ އަމިއްލަ މިސްރާބެއްގައި މަސައްކަތް ކުރާއިރު އަދި ސްޓްރެޓަޖީ ދުވަހުން ދުވަހަށް ބަދަލުވަމުންދާއިރު އަބަދުވެސް މަސައްކަތް ކުރަމުންދާނީ ތިމާވެއްޓަށް ކުރާ ނޭދެވޭ އަސަރު ކުޑަކުރުމަށް ކުރެވެން ހުރި މަސައްކަތްތައް ކުރުމަށްކަމަށް ކަރލް ވިދާޅުވިއެވެ.
މިއަހަރު، އަލަށް 56 އޭޓީއެމް ބެހެއްޓުމަށް ނިންމާފައިވާއިރު، ހުރިހާ އޭޓީއެމްއަކީ ވެސް އިރުގެ ހަކަތަ ބޭނުންކޮށްގެން ހިންގޭ އޭޓީއެމް އަށް ހެދުމަށް މަސައްކަތްކުރަމުންދާކަމަށް ކަރލް ވިދާޅުވިއެވެ. އަދި ބީއެމްއެލްގެ ބްރާންޗުތަކުގެ އަލަށް ކުރާ މަރާމަތުގެ މަސައްކަތްތަކަކީ ވީހާވެސް ބޮޑަށް ދެމެހެއްޓެނެވި ހަކަތަ ބޭނުންކޮށްގެން ކުރާ މަސައްކަތަށް ހެދުމަކީވެސް އަމާޒެއްކަމަށް އޭނަ ވިދާޅުވިއެެވެ.
