ހުޅުމާލޭ ސެންޓްރަލް ޕާކު ސަރަހައްދުގައި ހުންނަ ސްޓެލްކޯގެ ޑިސްޓްރިބިއުޝަން ފޮށިތަކުން ކަރަންޓު ކޭބަލްތަކެއް ވަގަށް ނަގައިފިއެވެ.
"ވެކޭޝަން އެކްސްޕޯ" ކުރިއަށް ގެންދާ ހައިރައިސް ކުންފުނީގެ ވެރިޔާ އިސްމާއިލް ހަމީދު ކުރެއްވި ޓްވީޓެއްގައި ބުނެފައިވަނީ ހުޅުމާލޭ ޕޮލިސް ސްޓޭޝަން ކުރިމަތީ ސެންޓްރަލް ޕާކު ސރަހައްދުގައި ހުރި ޑިސްޓްރިބިއުޝަން ފޮށިތަކުން ރޭ ވައްކަންކޮށްފައިވާ ކަމަށެވެ.
ވެކޭޝަން އެކްސްޕޯ ސެންޓްރަލް ޕާކުގައި ކުރިޔަށް ދަނިކޮށް އެ ފޮށިތަކުން ކަރަންޓު ކޭބަލްތައް ވަގަށް ނަގާފައިވާ ކަމަށް އޭނާ ވަނީ ބުނެފައެވެ.
Some of the Main cables of STELCO @STELCOMALDIVES distribution boards outside the Vacations Expo area in Central Park has been stolen last night. This is just in front of hulhumale @PoliceMv station on sight and with hired security for the event. Can’t imagine how public can… pic.twitter.com/wxYEr57okt
— Highrise Issey (@highriseissey) April 26, 2024
އޭނާ ބުނާގޮތުން އާންމު ތަންތަނުން މިގޮތަށް ވައްކަން ކުރަމުންދާއިރު އާންމު ރައްޔިތުންގެ މުދަލާއި ގެޔާއި ގެދޮރު ވެސް ރައްކާތެރިއެއް ނޫނެވެ. ދާދި ފަހުން ވެސް ޓްރާންސްފޯމާތަކުން ވަނީ ވައްކަންކޮށްފައެވެ. އެގޮތުން މާރޗް 22 ވަނަ ދުވަހުވެސް ހުޅުމާލޭ ޓްރާންސްފޯމާ ތަކުން ވައްކަން ކުރަމުންދާތީ ހުޅުމާލޭގައި ކަރަންޓު މައްސަލަތައް ދަނީ ކުރިމަތިވަމުންނެވެ.
މިދިޔަ މާރްޗްމަހު 24 ވަނަ ދުވަހު ހުޅުމާލޭ ޓްރާންސްފޯމާތަކުން ވައްކަން ކުރަން އުޅެނިކޮށް ކަރަންޓު ޖެހި ޒުވާނަކު ވެސް ވަނީ މަރުވެފައެވެ.
މިފަދަ މައްސަލަތައް ހުއްޓުވުމަށް ދާދި ފަހުންވެސް ސްޓެލްކޯއިން ވަނީ ވައްކަން ކޮށްގެން ވިއްކާ ތަކެތި ގަންނަ މީހުންނަށްވެސް ފިޔަވަޅު އަޅާނެ ކަމަށް ބުނެފައެވެ.
މިކަމާއި ގުޅިގެން ފުލުހުން އަދި ސްޓެލްކޯގެ ބަހެއް ލިބޭ ގޮތެއް ނުވިއެވެ.
