އަހަރުގެ ތެރޭގައި އަންނަ އެންމެ މާތް ރޭކަމުގައިވާ ލައިލަތުލް ޤަދުރި ވިލޭރޭގެ ދަރުމަ ލިބޭތޯ ރޭ އަޅުކަން އިތުރު ކުރުމަށް މަސައްކަތް ކުރުމަށް މިއަދުގެ ހުކުރު ހުތުބާގައި ގޮވާލައިފިއެވެ.
"ކާމިޔާބީތަކެއްގެ މައްސަރު" މި މައުޟޫއުއަށް މިއަދު އިއްވި ހުތުބާގައި ބުނެފައިވަނީ މިމައްސަރުގައި ދެއްވާފައިވާ އެންމެ ބޮޑު އެއް ކާމިޔާބީއަކީ މީހާގެ މުޅި ޢުމުރުގައި ކޮށްފައިވާ ފާފައިން ޠާހިރުވުމުގެ ފުރުޞަތުކަމަށެވެ. އެއީ ލައިލަތުލް ޤަދުރި ވިލޭރޭގެ މަތިވެރި ފުރުޞަތުކަމަށާއި، އެރޭގެ ހެޔޮކަން އެއްހާސް މައްސަރުގައި ކޮށްފައިވާ ހެޔޮކަމަށްވުރެ ބޮޑުކަން ހުތުބާގައި ފާހަގަކޮށްފައިވެއެވެ.
އެއްހާސް މައްސަރަކީ ގާތްގަނޑަކަށް އަށްޑިހަ ތިން އަހަރާއި ހަތަރު މަހެވެ. މި މާތް ރޭގެ މަތިވެރިކަން ލިބިގަތުމަށްޓަކައި ރަމަޟާން މަހުގެ ފަހުދިހައިގާ އިތުރަށް ހީވާގިވުމަށް ހުތުބާގައި ނަސޭހަތްތެރިވެފައިވެއެވެ.
ހުތުބާގައި ވަނީ، ބަރަކާތުން ފުރިފައިވާ ދުވަސްތައް ފެށުނުތާ އަދި މާގިނަ ދުވަސްތަކެއް ވީހެނެއް ހީވެސް ނުވާކަމަށައި، މިހާރު މިވަނީ ނިމުމަކާ ގާތްވެފައިކަން ފާހަގަކޮށްފައެވެ. އެހެންކަމުން އަހަރުގެ ތެރޭގައި އަންނަ އެންމެ މާތް ރޭގެ ދަރުމަ ލިބޭތޯ ރޭ އަޅުކަން އިތުރު ކުރުމަށް މަސައްކަތް ކުރުމަށް ހުތުބާގައި ވަނި ނަސޭހަތްތެރިވެފައެވެ.
ރަސޫލު صلى الله عليه وآله وسلم އެކަލޭގެފާނުގެ އަހުލުބައިތުންވެސް ރޭއަޅުކަމަށް ނަންގަވާކަމަށާއި، ފަހުދިހައިގާ އިހުނަށް ވުރެ ބޮޑަށް ހީވާގިވެ ވަޑައިގަންނަވާކަން ހުތުބާގައި ފާހަގަކޮށްފައިވެއެވެ.
ހިތުބާގައި ވަނީ މާތްلله އަށް ތަގުވާވެރި ވުމަށް ނަސޭހަތްތެރިވެފައެވެ. އެނބުރި ރުޖޫޢަވާންޖެހޭ ދުވަހުގެ ދަތުރަށް ލިބިގެންވާ އެންމެ ރަނގަޅު ކޮއްތަކީ ތަގުވާވެވެރިކަން ކަމަށާއި، އެހެންކަމުން ތަގުވާވެރިވުމަށް އަވަސްވެގަތުމަށް ނަސޭހަތްތެރިވެފައެވެ.