ދެކުނު އޭޝިއާ ކޮލިފިކޭޝަންސްގެ ސިންގަލްސް ރަންވަނަ ހޯދާ ޓީޓީގެ ތަރި ފާތިމަތު ދީމާ އަލީ، އޮލިމްޕިކްސް އަށް ކޮލިފައިވުމާއި ގުޅިގެން ރައީސް، ޑރ. މުހައްމަދު މުއިއްޒު އާއި ހާރިޖީ ވަޒީރު މޫސާ ޒަމީރު ދީމާ އަށް މަރުހަބާ ދަންނަވައިފިއެވެ.
ރައީސް އެކްސްގައި ކުރެއްވި ޕޯސްޓެއްގައި ވިދާޅުވީ، މިއަދަކީ ދިވެހި ކުޅިވަރަށް ތާރީހީ ދުވަހެއް ކަމަށާއި ޓޭބަލް ޓެނިހުން ދީމާ ހޯދަމުންދާ ކާމިޔާބީތަކާއިއެކު މުޅި ގައުމު ފަހުރުވެރިކޮށްދީފައިވާ ކަމަށެވެ. ރައީސް ވަނީ ފްރާންސްގެ ވެރިރަށް ޕެރިހުގައި ބާއްވާ އޮލިމްޕިކްސް މުބާރާތުގައި ދީމާއަށް ކާމިޔާބީއަށް އެދިވަޑައިގެންފައެވެ.
Historic moment for Maldivian sports! Congratulations to Fathimath Dheema Ali on being the first Maldivian to qualify for the #Olympics. Your perseverance and excellence in Table Tennis have made our nation proud. Best wishes for Paris 2024! #Paris2024 #TeamMaldives pic.twitter.com/cOa79QVzR6
— Dr Mohamed Muizzu (@MMuizzu) May 15, 2024
ދީމާ ހޯދި ކާމިޔާބީއާއި ގުޅިގެން ވަޒީރު "އެކްސް" ގައި ކުރި ޕޯސްޓެއްގައި ވިދާޅުވީ ކަތަމަންޑޫގައި ކުރިއަށް ދިޔަ ސައުތު އޭޝިއަން ރީޖަނަލް ކޮލިފިކޭޝަންގެ އަންހެން ސިންގަލްސް އިން އެއްވަނަ ހޯދާ ޕެރިސްގައި އޮންނަ އޮލިމްޕިކްސް 2024 އަށް ކޮލިފައިވެފައިވާތީ ދީމާ އަށް މަރުހަބާ ކިޔާ ކަމަށާއި ދީމާ އަކީ ދިވެހި ތާރީހުގައި ވެސް އޮލިމްޕިކްސްގައި ވާދަކުރާ ފުރަތަމަ ދިވެހި އެތުލީޓުކަން ފާހަގަކޮށް ދިވެހި ގައުމު ފަހުރުވެރިވާ ކަމަށް ވިދާޅުވެފައެވެ.
Congratulations to Fathimath Dheema Ali for qualifying for Paris Olympics 2024 after winning the Women's Singles in South Asian Regional Qualification held in Kathmandu. Dheema made history by becoming the first Maldivian athlete to be qualified for an Olympics. She makes us all…
— Moosa Zameer (@MoosaZameer) May 15, 2024
އަދި އޮލިމްޕިކްސް ގައި ދީމާ އަށް ރަނގަޅު ކާމިޔާބީ އަކަށް އުއްމީދު ކުރައްވާ ކަމަށް ވަޒީރު ވަނީ ވިދާޅުވެފައެވެ.
![](https://vaguthu.mv/wp-content/uploads/2024/05/4b083932-7924-489d-b799-435e370a456fpng-1024x576.jpeg)
މިއަހަރު ފްރާންސްގެ ޕެރިހުގައި އޮންނަ އޮލިމްޕިކްސް އަށް ދީމާ ކޮލިފައިވެފައިވަނީ ދެކުނު އޭޝިއާ ސަރަހައްދުގެ ކޮލިފައިން ބުރުގައި އަންހެން ސިންގަލްސް އިން ރަން މެޑަލް ހޯދައިގެންނެވެ. ނޭޕާލުގައި ކުރިއަށް ދިޔަ މި މުބާރާތުގެ ޗެމްޕިއަންކަން ދީމާ ހޯދާފައިވަނީ މިއަދު މެންދުރު ފަހު، ކޮލިފިކޭޝަނުގެ ފައިނަލުގައި ސްރީ ލަންކާގެ ބަންޑާރާ ބިމަންދީ އާ ދެކޮޅަށް ކުޅެގެންނެވެ. މި މެޗު ދީމާ ކާމިޔާބުކުރީ 1-4 ސެޓުންނެވެ.
ފައިނަލް މެޗުގެ ފުރަތަމަ ސެޓު ދީމާ ކާމިޔާބުކުރީ 11-8 އިންނެވެ. ދެ ވަނަ ސެޓު ލަންކާގެ ބަންދަރާ ވަނީ 11-7 އިން ކާމިޔާބު ކުރިއިރު ތިންވަނަ ސެޓު ދިޔައީ ވަރަށް ވާދަވެރިކޮންނެވެ. މި ސެޓު ދީމާ ގެންދިޔައީ ސެޓުގެ ފަހު ވަގުތު ދެއްކި ތަފާތު މޮޅު ކުޅުމުންނެވެ. މި ސެޓު ދީމާ ކާމިޔާބުކުރީ 11-13 އިންނެވެ. ހަތަރުވަނަ ސެޓުގައިވެސް ދީމާގެ ފަރާތުން މޮޅު ކުޅުމެއް ފެނިގެން ދިޔައެވެ. އިތުބާރާއިއެކު ކުޅެމުންދިޔަ ދީމާ މި ސެޓު ކާމިޔާބު ކޮށްފައިވަނީ 11-7 ގެ ނަތީޖާ އަކުންނެވެ. އަދި ފަހު ސެޓުގައިވެސް ދީމާ ވަނީ ލަންކާގެ ބަންދަރާ އަށް ދުލެއް ނުދީ 11-5 އިން ކާމިޔާބުކޮށް މެޗު ނަގާފައެވެ.
![](https://vaguthu.mv/wp-content/uploads/2024/05/696a506a-d870-4f19-a73b-45feb62a1140png.jpeg)
އިންޑިޔާ ފިޔަވާ ސަރަހައްދުގެ ހުރިހާ ގައުމަކުން ބައިވެރިވި ކޮލިފިކޭޝަންގައި ރާއްޖޭގެ ހަތަރު ކުޅުންތެރިއަކު ވާދަކޮށްފައިވެއެވެ. ރާއްޖޭން ބައިވެރިވި ހަތަރު ކުޅުންތެރިންގެ ތެރޭގައި ހިމެނެނީ ދީމާ ގެ އިތުރުން މިޝްކާ މުހައްމަދު އިބްރާހިމާއި އަހްޔާރު އަހުމަދު ހާލިދު އަދި މުންސިފް އަހުމަދު އެވެ.
ދިވެހިރާއްޖެއިން އޮލިމްޕިކްސް އަށް ކޮލިފައިވި ފުރަތަމަ ކުޅުންތެރިޔާގެ ޝަރަފު ދީމާ ހޯދާފައިވާއިރު، ދީމާ އަކީ މޯލްޑިވްސް އޮލިމްޕިކް ކޮމިޓީން ދިން ޕެރިސް އޮލިމްޕިކްސް ސްކޮލަޝިޕް ލިބުނު އެތުލީޓެކެވެ. ކޮލިފިކޭޝަން ބުރު ކާމިޔާބު ކުރުމާއިއެކު ދީމާ އަށް މިވަނީ އަންނަ ޖުލައި މަހު ފެށުމަށް ހަމަޖެހިފައިވާ އޮލިމްޕިކްސް އިން ފުރުސަތު ލިބިފައެވެ.