ކުރިއަށް އޮތް ރިޔާސީ އިންތިޚާބުގައި ރައީސް ޞޯލިހަށް ބައިއަތުހިފަން އެމްޑީއޭ ނިންމައިފިއެވެ.
މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ) އިން މިފަދަ ނިންމުމެއް މިއަދު ނިންމިއިރު، ރިޔާސީ އިންތިޚާބުގެ ވޯޓުލުން ބޭއްވުމަށް އިލެކްޝަނުން ނިންމާފައިވަނީ އަންްނަ ސެޕްޓެމްބަރު މަހުގެ ނުވަ ވަނަ ދުވަހުއެވެ.
އެމްޑީޕީއާއެކު ރިޔާސީ އިންތިޚާބުގައި މަސައްކަތް ކުރުމަށް އެމްޑީއޭއިން ނިންމިއިރު، އިދިކޮޅު ސިޔާސީ ޕާޓީ ޕީޕީއެމް އަދި ޕީއެންސީއިންވެސް އެ އާޕީއާއެކު ކޯލިޝަން ހެދުމަށް ޝައުގުވެރިކަން ފާޅުކޮށް މަޝްވަރާކޮށްފައިވެއެވެ.
އަންނަ ރިޔާސީ އިންތިޚާބުގައި ވާދަކުރެއްވުމަށް ކުރިން ނިންމެވި ނަމަވެސް ފަހުން އެމްޑީއޭގެ ރައީސް އަދި މީދޫ ދާއިރާގެ މެމްބަރު އަހުމަދު ސިޔާމް މުޙައްމަދު ވަނީ އިންތިޚާބުގައި ވާދަކުރެއްވުމަކީ އެންމެ ރަނގަޅު ގޮތް ނޫންކަމަށް ވިދާޅުވެ، މި އިންތިޚާބުގައި ވާދަނުކުރައްވަން ނިންމަވާފައެވެ.
އެމްޑީއޭއިން މިއަދު ވިދާޅުވީ، ދިވެހިރައްޔިތުންގެ ލާބަޔާއި މަންފާއަށްޓަކައި ދިވެހި ރާއްޖޭގެ ޕޮލިޓިކަލް ސްޓެބިލިޓީ ޤާއިމުކުރުމަށްޓަކައި އެމްޑީއޭގެ ކައުންސިލުން މިއަދު ނިންމާފައިވަނީ ރައީސް ޝޯލިޙަށް އިތުރު ދައުރެއް ދިނުމަށް މަސައްކަތް ކޮށްދިނުމަށް އެމްޑީޕީއާއެކު ކޯލިޝަން ހެދުމަށް ކަމަށެވެ.
#Breaking
Dhivehi rayyithunge laabaya manfaa attakaiy, dhivehi raaajeyge political stability gaaimukurunahtakai MDA ge Council meeting in miadhu ninmaafai vanee Raees @ibusolih ah ithuru dhaureh dhinumah massakai kohdhinumahtakai MDP aa eku coalition hedhumah! #Ibu2023 pic.twitter.com/4GsGXftCEw— MDA Secretariat (@SecretariatMDA) February 24, 2023
އަންނަ ރިޔާސީ އިންތިޚާބުގައި ވާދަކުރައްވާނެކަން މިހާތަނަށް އިއުލާން ކުރައްވާފައިވަނީ ރައީސް ޞޯލިޙް އަދި ރައީސް ޔާމީންއެވެ. އަދާލަތު ޕާޓީއާއި އެމްޑީއޭއިން ރައީސް ޞޯލިޙަށް ތާއީދުކުރަން ނިންމާފައިވާއިރު، ޖުމްހޫރީޕާޓީ އަދި އެމްއާރުއެމްއިން މިކަމުގައި އަދި ވަކިގޮތެއް ނިންމާފައި ނުވެއެވެ.
