މ. މަޑުއްވަރިން 3 މީހުންނާއެކު ފަރުމަހަށް ނުކުމެ އުޅުނު "ފަރިހި 2" ނަމަކަށް ދޯނި ހޯދުމަށް ކަނޑާއި ވައިގެ މަގުން މިހާތަނަށް 440 އަކަ ނޯޓިކަލް މޭލުގެ ސަރަހައްދެއް ބަލާފައިވާ ކަމަށް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން މިއަދު ބުނެފިއެވެ.
އެ މީހުން މަހަށް ނިކުމެފައި ވަނީ ރަތްމަންދޫ ބޭރަށް، ޑައިވިން ދޯންޏެއްގައެވެ.
މަޑުއްވަރީ ކައުންސިލުންނާއި އެމްއެންޑީއެފުން މީގެ ކުރިން ބުނެފައިވާ ގޮތުން އެ ދޯނީގައި މަހަށް ނިކުތީ ދެ މީހުންނެވެ.
އެކަމަކު މިއަދު ހެނދުނު އަށެއް ޖެހީހައިރު މީޑިއާ އަށް ފޮނުވި މެސެޖެއްގައި އެމްއެންޑީއެފުން ބުނީ އެ ދޯނިން، މަހަށް 3 މީހަކު ގޮސްފައިވާ ކަމުގެ މައުލޫމާތު ލިބިފައިވާ ކަމަށެވެ. އެއީ ދިވެހި ތިން ފިރިހެނުންނެވެ. އެ މީހުންނާ ގުޅޭ އިތުރު މައުލޫމާތެއް ދީފައެއް ނުވެއެވެ.
ދޯނި ހޯދަން އެމްއެންޑީއެފުން ދަނީ ޑްރޯން ބޭނުންކުރަމުންނެވެ. ހުއްޓުމެއްނެތި ގެއްލުނު ދޯނި ހޯދުމުގެ މަސައްކަތް ކުރަމުން އަންނަ ކަމަށް އެމްއެންޑީއެފުން ބުންޏެވެ.
ދޯނި ގެއްލިގެން ފުލުހުންނަށް ރިޕޯޓުކޮށްފައި ވަނީ ރޭ 22:06 އެހާކަންހާއިރުއެވެ. އަދި އެއަށް ފަހު ފުލުހުންނާއި އެމްއެންޑީއެފް ގުޅިގެން އަންނަނީ ދޯނި ހޯދުމުގެ މަސައްކަތް ކުރަމުންނެވެ.
އެ ދޯންޏާއި އެ މީހުންނާ ބެހޭ އެއްވެސް މައުލޫމާތެއް ލިބިފައިވާނަމަ އެމަޖެންސީ ނަންބަރު 119 އަށް ނުވަތަ ކޯސްޓްގާޑަށް ގުޅުއްވައި އެ މައުލޫމާތެއް ހިއްސާކުރަން ފުލުހުން އެދެއެވެ.
