އިޒްރޭލުގެ ޕާސްޕޯޓު އޮންނަ މީހުން ރާއްޖެއަށް އެތެރެވުން މަނާކުރުމަށް އިމިގްރޭޝަން ގާނޫނު ބަދަލުކުރަން ހުށަހެޅުއްވީ ގަލޮޅު ދެކުނު ދާއިރާގެ އެމްޑީޕީގެ މެންބަރު މީކާއިލް އަހުމަދު ނަސީމެވެ. މިދިޔަ މެއި މަހުގެ 29 ވަނަ ދުވަހު ހުށަހެޅި ބިލު ބަލައިގަނެ ކޮމިޓީއަށް ފޮނުވި ފަހުން، އެ ބިލު އަދިވެސް އޮތީ ކޮމިޓީ މަރުހަލާގައި ޕާކުވެފަ އެވެ.
ޕީއެންސީން މިރޭ ނެރުނު ބަޔާނެއްގައި ބުނީ މި އަހަރުގެ ޖޫން މަހު ވަޒީރުންގެ މަޖިލީހުގެ މަޝްވަރާއާއި ލަފާގެ މަތިން ރައީސް ޑރ.މުހައްމަދު މުއިއްޒު ނިންމަވާފައިވާ ގޮތަށް އިމިގްރޭޝަން ގާނޫނަށް ގެންނަންޖެހޭ ބަދަލުތައް ވީހާވެސް އަވަހަށް ގެނައުމަކީ ތާއީދުކުރާ ކަމެއް ކަމަށެވެ.
އެގޮތުން މިހާރު ރައްޔިތުންގެ މަޖިލީހުގައި އޮތް އިމިގްރޭޝަންގެ ގާނޫނު އިސްލާޙުކުރުމުގެ ބިލު ދިރާސާކުރުމުގެ މަސައްކަތް އަވަހަށް ނިންމައި، ރައްޔިތުންގެ ރޫޙާއި ވިންދާ އެއްގޮތަށް ރައީސް މުއިއްޒު ނިންމަވާފައިވާ ނިންމެވުން ހަގީގަތަކަށް ހެދުމުގެ މަސައްކަތް މަޖިލީހުން ހަލުއިކަމާއެކު ކުރުމަށް ވަނީ ގޮވާލާފަ އެވެ.
މިދިޔަ މަހުގެ ރައީސް އޮފީހުން ވަނީ، މަޖިލިސް ޗުއްޓީއަށް ފަހު އިސްރާއީލު ޕާސްޕޯޓު މަނާކުރުމުގެ މަސައްކަތް ބާރަށް ކުރިއަށްގެންދާނެ ކަމަށް ބުނެފަ އެވެ.
އެ ބިލުގައި މިހާރު އޮތީ އިޒްރޭލް ޕާސްޕޯޓު ގެންގުޅޭ މީހުންނާއި އިޒްރޭލް ޕާސްޕޯޓު އޮންނަ އެހެން ގައުމެއްގެ މީހުންނަށް ވެސް ރާއްޖެ އައުން މަނާވާ ގޮތަށެވެ.
ނަމަވެސް އިޒްރޭލު ޕާސްޕޯޓު އޮންނަ އެންމެންނަށް ރާއްޖެ އަށް ނުވަދެވޭ ގޮތަށް އޮތް އޮތުން ބަދަލު ކުރަން ޖެހޭ ކަމަށް އުޝާމް ވިދާޅުވެފައިވެ އެވެ. އޭގެ އެއް ސަބަބަކީ އޭނާ ވިދާޅުވި ގޮތުގައި އިޒްރޭލް ޕާސްޕޯޓުގައި ވަރަށް ގިނަ ފަލަސްތީން ރައްޔިތުން ވެސް ގައުމުތަކަށް ދަތުރު ކުރުމެވެ.
އިސްރާއީލުން މިދިޔަ އަހަރުގެ އޮކްޓޯބަރު މަހުގެ ހަތް ވަނަ ދުވަހު ގާޒާއަށް ވަރުގަދަ ހަމަލާތަކެއް ދޭން ފަށައި، އަދިވެސް ގެންދަނީ އެ ސަރަހައްދުގައި ޖަރީމާތައް ހިންގަމުންނެވެ. އިޒްރާއީލުގެ މި އަނިޔާވެރިކަމާއި ދެކޮޅަށް ރާއްޖެއިން އަންނަނީ ގައުމީ ފެންވަރެއްގައި އަޑު އުފުލަމުންނެވެ. އަދި ފަލަސްތީނުގެ މިނިވަންކަމަށް ވަކާލާތުކުރައްވާ އިޒްރޭލުގެ އަނިޔާވެރިކަން ކުށްވެރި ކުރަމުންނެވެ
ގާޒާގެ މިނިސްޓްރީ އޮފް ހެލްތުން ބުނާ ގޮތުގައި އިސްރާއީލުގެ ހަމަލާތަކުގައި 42400 އަށްވުރެ ގިނަ ފަލަސްތީނު ރައްޔިތުން ޝަހީދުވެފައި ވެއެވެ. އަދި އެތައް ހާސް މީހުން ސަލާމަތްނުކުރެވި އިމާރާތްތަކުގެ ތެރޭގައި ވަޅުލެވިފައިވެސް ވެ އެވެ.
