އިނގިލިތައް ބުރިކޮށްލާނެ ކަމަށް ބުނި މީހުން ބަންދުކޮށްފި

ވަޅިން ބިރުދައްކާ ފައިސާ ނުދީފިނަމަ އިނގިލިތައް ބުރިކޮށްލާނެ ކަމަށް ބުނެ ފޭރުނު ދެ މީހުންގެ ބަންދަށް 15 ދުވަސް ޖަހައިފި އެވެ.

އެ މައްސަލައިގައި ހައްޔަރުކޮށްފައިވަނީ ސ. ހިތަދޫ، އަތިރީއާގެ، އަހުމަދު ސިވާތާއި ހަމަ އެ ރަށުގެ ޑެލައިޓްފޭސް ގެޔަށް ނިސްބަތްވާ މުހައްމަދު ސާލިމް އެވެ. މި ދެ މީހުންގެ ބަންދާއި މެދު ގޮތެއް ނިންމަން ހާޒިރުކުރުމުން ވަނީ 15 ދުވަހަށް ބަންދުގައި ބެހެއްޓުމަށް އަމުރުކޮށްފަ އެވެ.

ފުލުހުން ބުނީ ރޭ ރަސްފަންނުގައި ތިބި ބިދޭސީންތަކަކަށް ވަޅިން ބިރުދައްކައި، ލާރި ނުދީފި ނަމަ އިނގިލިތައް ބުރިކޮށްލާނެ ކަމަށް ބުނެ އިންޒާރުދީގެން، އެ ދެ ބިދޭސީ މީހުންގެ ވޮލެޓުގައި ހުރި ފައިސާ ފޭރިގެންފައިވާ ކަމަށެވެ.

އެ ދެ މީހުން އަތުލައިގަތް ފައިސާ ވެސް ހޯދައިފައިވާ ފުލުހުން ބުނެ އެވެ.

ފުލުހުން އަންނަނީ އެ މައްސަލަ ތަހުގީގު ކުރަމުންނެވެ.

The post އިނގިލިތައް ބުރިކޮށްލާނެ ކަމަށް ބުނި މީހުން ބަންދުކޮށްފި appeared first on adduLIVE.