މަގުމަތީގެ ސަލާމަތާއި ރައްކާތެރިކަމަށް ސްކޫލު ދަރިވަރުން އަހުލުވެރިކުރުވުމަށް ފުލުހުން ކުރަމުންދާ މަސައްކަތްތަކުގެ ތެރެއިން، ގއ. ކަނޑުހުޅުދޫ ސްކޫލު ދަރިވަރުންނަށް މައުލޫމާތު ދިނުމުގެ ކުލާހެއް ކުރިއަށް ގެންގޮސްފިއެވެ.
މި ހިނގާ ޖުލައި މަހުގެ 23 ވަނަ ދުވަހު އެ ސްކޫލްގައި ބޭއްވި މި ކުލާހުގައި، މަގުމަތީގެ ސަލާމަތާއި ރައްކާތެރިކަމާއި މަގުމަތީގެ އަދަބުތަކާ ގުޅޭގޮތުން ދަރިވަރުންނަށް ކޮންމެހެން އެނގެންޖެހޭ ކަންކަން ބުނެދީފައިވެއެވެ. އަދި ޓްރެފިކް ނިޝާންތައް ބުނެދީ މަގުމަތީގައި އުޅޭއިރު ދުއްވާއެއްޗިއްސަށް ބަލައިގެން އުޅުމަށާއި އެހެން މީހުންނަށް އުނދަގޫ ނުވާނޭހެން އުޅުމަށް ނަސޭހަތްތެރިވެފައިވެއެވެ.
އޭގެ އިތުރުން، ބައިސްކަލު ދުއްވާއިރު ސަމާލުކަން ދޭންޖެހޭ ކަންކަމާއި އެއް ކުއްޖަކަށްވުރެ ގިނަ ކުދިން އެއް ބައިސްކަލަކަށް އަރައިގެން ނުދުއްވުމަށާއި ރޭގަނޑު ބައިސްކަލު ދުއްވާނަމަ ބައިސްކަލު ބައްތި ދިއްލައިގެން ދުއްވުމަށް ނަސޭހަތްތެރިވެފައިވެއެވެ.
ކަނޑަހުޅުދޫ ޕޮލިސް ޑެސްކާއި ކޮނޑޭ ޕޮލިސް ޕޯސްޓު ގުޅިގެން ކުރިއަށް ގެންދިޔަ މި ކުލާހުގައި ކަނޑުހުޅުދޫ ސްކޫލުގެ ގްރޭޑް 6 އިން 10 ތައުލީމު ހާސިލުކުރަމުންދާ 50 ދަރިވަރުން ބައިވެރިވިއެވެ.
