މިއީ އީރާނަށް ހަމަލާދޭންވީ އެންމެ ރަނގަޅު ވަގުތު ކަމަށްބުނެ އީރާނާ ދެކޮޅަށް އަސްކަރީ ހަމަލާދިނުން އަވަސްކުރުމަށް އިސްރާއީލްގެ ކުރީގެ ޑިފެންސް މިނިސްޓަރ ބެނީ ގަންޓްޒް ގޮވާލައިފިއެވެ.
ADS BY: STELCO
ގަންޓްޒް ވަނީ އީރާނާ ދެކޮޅަށް ވަގުތުން ފިޔަވަޅު އަޅަންޖެހޭ ކަމަށް ގޮވާލާފައެވެ. ނިއު ޔޯކް ޓައިމްސްގައި ޝާއިޢުކޮށްފައިވާ ލިޔުމެއްގައި ގަންޓްޒް ބުނެފައިވަނީ އިސްރާއީލުން ހަމާސްގެ ނުރައްކާ ކުޑަކޮށް އަންދާޒާކުރި ފަދައިން، އެހެން ޤައުމުތަކުން އީރާނުގެ ނުރައްކާ ކުޑަކޮށް ނުދެކުމަށް އިންޒާރުދޭ ކަމަށެވެ.
ގަންޓްޒް ބުނީ، އީރާނާއި ހަމާސްގެ ލަނޑުދަނޑިއަކީ އެކައްޗެއް ކަމަށެވެ. އެއީ އިސްރާއީލް ނައްތާލުމެވެ. އޭނާ ބުނެފައިވަނީ އީރާނުގެ ވެރިކަން ހަމާސްއާ ވަރަށް ބޮޑަށް އެއްގޮތް ކަމަށެވެ. އަދި ދެފަރާތުންވެސް މަސައްކަތްކުރަނީ އެމީހުންގެ ހަރުކަށި ފިކުރު ފަތުރައި، އަނިޔާވެރި ގޮތްތަކުން ބާރު ހޯދުމަށް ކަމަށެވެ.
އީރާނާ ދެކޮޅަށް އަޅަންޖެހޭ ފިޔަވަޅުތަކުގެ ތެރޭގައި ގަންޓްޒް ފާހަގަކޮށްފައިވަނީ އަސްކަރީ، އިޤްތިޞާދީ، ޤާނޫނީ އަދި ސިޔާސީ ދާއިރާތަކުން ފިޔަވަޅުތަކެއް އަޅަންޖެހޭ ކަމަށެވެ. މިގޮތުން، އީރާނުގެ އުދުވާނީ ޢަމަލުތަކާ ދެކޮޅަށް ވަރުގަދަ އަދި އިސްނަގައިގެން ފިޔަވަޅު އެޅުމާއި، ޓެރަރިޒަމަށް ފައިސާ ދިނުން ހުއްޓުވުމަށް ދަތިކުރުންތައް ހަރުދަނާކުރުމާއި، އީރާނުގެ ވެރިކަން ބައިނަލްއަޤްވާމީ ފޯރަމްތަކުގައި އެކަހެރިކުރުން ހިމެނޭކަމަށް އޭނާ ބުނެފައިވެއެވެ.
ގަންޓްޒް ބުނެފައިވަނީ އިސްރާއީލަކީ މެދު އިރުމަތީގެ އެންމެ ވަރުގަދަ ޤައުމު ކަމަށާއި، އެ ޤައުމުގެ މުސްތަޤްބަލާއި ރައްޔިތުންގެ ޙައްޤުގައި ޢަދުލުވެރި ހަނގުރާމައެއް ކުރަމުންދާ ޤައުމެއް ކަމަށެވެ. އެހެންކަމުން އިސްރާއީލް ކާމިޔާބު ވާނެ ކަމަށް އޭނާ ޔަޤީންކުރެއެވެ.
އޭނާ ބާރުއަޅާފައިވަނީ އީރާނާ ދެކޮޅަށް ޢަމަލުކުރަންވީ ވަގުތަކީ މިއީ ކަމަށެވެ. ގަންޓްޒްގެ މި ވާހަކަތަކަކީ މެދު އިރުމަތީގެ ސަރަޙައްދުގައި އޮތް ގެރިއްލާވެފައިވާ ސިޔާސީ މަޝްރަހަށް އިތުރު ހޫނުކަމެއް ގެނެސްދޭނެ ވާހަކަތަކެއް ކަމަށް ރިޕޯޓްތައް ބުނެއެވެ.
