އދގެ ކުޑަކުދިންނާބެހޭ އިދާރާ، ޔުނިސެފުން ހާމަކޮށްފައިވާ ގޮތުގައި އެންމެ ނިކަމެތި ހާލުގައި ކުޑަކުދިން އުޅެނީ އެފްރިކާގައެވެ. ކާބޯތަކެތި ނުލިބުމާއި، އެކަށީގެންވާ ސިއްހީ ފަރުވާ ނުލިބުމުގެ ސަބަބުން އެފްރިކާއަކީ އިންސާނީ ކާރިސާ އެންމެ ބޮޑު އެއް ސަރަހައްދުކަމަށް ޔުނިސެފުން ބުނެއެވެ.
ޔުނިސެފުން ހާމަކުރި މަޢުލޫމާތުތަކަށް ބަލާއިރު، އެފްރިކާގެ ދެބައިކުޅަ އެއްބައި ކުދިންނަށް ސިއްހީ ހިދުމަތް ނުލިބޭ ކަމަށާއި، ގާތްގަނޑަކަށް 40 އިންސައްތަ ކުދިންނަށް ދިގު މުއްދަތަކަށް ކާނާ ލިބުން ވަނީ ދަތިވެފައެވެ. މީގެ އިތުރުން ސާފު ފެނާއި، ސާފުތާހިރުކަން ނުވަތަ ދުޅަހެޔޮ ކާނާ ލިބެނީ މަދު ބަޔަކަށް ކަމަށްވެސް ޔުނިސެފުން ބުނެއެވެ.
ޖެނީވާގައި ނޫސްވެރިންނާ ވާހަކަ ދައްކަވަމުން ސެންޓްރަލް އެފްރިކަން ރިޕަބްލިކް (ސީއޭއާރު) ގައި ހުންނަ ޔުނިސެފްގެ މަންދޫބު މެރިޓްސެލް ރެލާނޯ އަރާނާ ވިދާޅުވީ ޣައްޒާގެ ހަނގުރާމައާއި އެހެނިހެން ހަމަނުޖެހުންތަކަށް ދުނިޔޭގެ ސަމާލުކަން ދިނުމުން ހާލުގައި ޖެހިފައިވާ އެފްރިކާ ކުދިންނަށް ލިބޭ ސަމާލުކަން ވަނީ ވަރަށް ބޮޑަށް ކުޑަވެފައި ކަމަށެވެ.
އެފްރިކާގެ ކުޑަކުދިންގެ ހާލަތު އިތުރަށް ދަށްވަމުންދާކަން ޔުނިސެފްގެ ރިޕޯޓުތަކުން ދައްކާއިރު، ގިނަ ކުދިން ސްކޫލަށް ދިއުމުގެ ފުރުސަތު ގެއްލި، މަސައްކަތްކުރަން މަޖުބޫރުވެފައިވާ ކަމަށް ބެލެވެއެވެ. މީގެ އިތުރުން، ކުޑަކުދިންގެ ކާވެނި އަދި ކުޑަކުދިން ހަނގުރާމަތަކުގައި ބޭނުންކުރުން ފަދަ ނޭދެވޭ ކަންކަން އިތުރުވަމުންދާކަން ވެސް ފާހަގަކުރެވެއެވެ.
ޔުނިސެފުން ގޮވާލަނީ ބައިނަލްއަޤްވާމީ މުޖުތަމަޢުން އެފްރިކާގެ ކުޑަކުދިންނަށް އިތުރު އެހީތެރިކަން ފޯރުކޮށްދިނުމަށާއި، އެ ކުދިންގެ ހައްޤުތައް ރައްކާތެރިކުރުމަށް އަވަސް ފިޔަވަޅުތަކެއް އެޅުމަށެވެ.
އެފްރިކާއަކީ ދުނިޔޭގެ އެންމެ ފަގީރު އެއް ގައުމު ކަމަށްވާއިރު، މި ސަރަހައްދުގައި އަނިޔާވެރިކަން ފެށުނީ 2019 ވަނަ އަހަރުގެ ފެބްރުއަރީ މަހުއެވެ. ސަރުކާރާއި ހަތިޔާރު އެޅި 14 ޖަމާއަތަކާ ދެމެދު ސުލްހައިގެ އެއްބަސްވުމެއް އޮތް ނަމަވެސް އެކަމުގައި ސަރުކާރުގެ ކޮންޓްރޯލު ނެތިގެންދިޔަ ކަމަށް ޔުނިސެފުން ބުނެއެވެ.
