"މަޝްއަރު ޓުއާސް"ގެ ހަވާލުގައި ޢުމްރާއަށް ދިޔަ މީހުންނަށް ރާއްޖެ ނާދެވި މައްކާގައި ތާށި ވެއްޖެއެވެ.
އެ ގުރޫޕުން ރޯދަ މަހު އުމުރާއަށް ދިޔަ 56 މީހުން މައްކާގައި ތާށިވީ އެ ގްރޫޕުން އެއާލައިންތަކަށް ދައްކަން ޖެހޭ ޓިކެޓް ފައިސާ ދައްކާފައި ނުވާތީ މައްކާއިން ރާއްޖެއަންނަ ސެކްޓާގެ ޓިކެޓްތައް އެއާލައިންތަކުން ކެންސަލު ކުރުމުންނެވެ.
މަޝްއަރު ޓުއާސްގެ ދަށުން މި ރަމަޟާންމަހު ޖުމްލަ 56 މީހުން ޢުމްރާއަށް ދިޔައެވެ. މީގެތެރެއިން މާލެ ނާދެވި މައްކާގައި 48 މީހުންނަށް މަޑުކުރަން ޖެހިފައިވެއެވެ. މަޝްއަރުންވަނީ އެމީހުން އަމިއްލައަށް ޓިކެޓް ނެގުމަށްވެސް އަންގާފައެވެ.
"އަޅުގަނޑުމެން ހުރީ ކޮންފާމް ޓިކެޓް ނަގާފައި. ވިޔަފާރި ދެއްތޯ މިއީ ހަޤީގަތުގައިވެސް. އަޅުގަނޑުމެން ނަގާފައި ހުރި ޓިކެޓްތަކަށް އެއްބައި ފައިސާ ދައްކާފައި ހުންނާނީވެސް. އެބޭފުޅުން އެންމެ ފަހު ވަގުތު މިޑިމާންޑް ކުރަނީ އެއްކޮށް ފައިސާ ނުދައްކަނީސް އަޅުގަނޑުމެންގެ ޓިކެޓްތައް ކެންސަލް ކުރާނެކަމަށް. 9 ލައްކަ ރުފިޔާ ދައްކަން ޑިމާންޑް ކުރީ. 9 ލައްކަ ރުފިޔާ އެއްފަހަރާ ނުދެއްކުނީމަ އެބޭފުޅުން ކެންސަލް ކުރީ އިނގޭތޯ ޓިކެޓްތައް." މަޝްއަރު ޓުއާސްގެ ވެރިޔާ ޕީއެސްއެމް ނިއުސްއަށް ދީފައިވާ އިންޓަވިއުއެއްގައި ބުންޏެވެ.
އޭނާ ބުނި ގޮތުގައި 30 ދުވަހުގެ ތެރޭގައި ގްރޫޕުގެ ފަރާތުން ފައިސާ ދޭނެ ކަމަށް ބުނުމުން ގިނަ މީހުން އަމިއްލައަށް ޓިކެޓް ނަގައިގެން މިހާރު ރާއްޖެދާން ތައްޔާރުވެއްޖެއެވެ. އެގޮތުން މިހާތަނަށް ޓިކެޓްގެ ކަންކަން ހަމަޖެހިފައިވާ 42 މީހުން ކުރިއަށް އޮތް ދެ ދުވަހުގެ ތެރޭގައި ރާއްޖެ ދާނެއެވެ.
"ތިރީސް ދުވަހުގެ ތެރޭގައި އެމީހުންނަށް އަނބުރާ ޓިކެޓް ލާރި ދޭނަން،" ގްރޫޕުގެ ވެރިޔާ ވިދާޅުވިއެވެ. "ޢުމްރާވެރިންނަށް މާލެ ނާދެވި ލަސްވީ އެއްފަހަރާ ޓިކެޓް ފައިސާ ދައްކަންޖެހި ނުދެއްކުމުން."
The post މަޝްއަރު ޓުއާސް"ގެ ހަވާލުގައި ޢުމްރާއަށް ދިޔަ އެންމެން ރާއްޖެ ނާދެވި މައްކާގައި ތާށިވެއްޖެ first appeared on Minivan.
