މިއަދު ހަވީރު ހިނގި އެކްސިޑެންޓްގައި ޓެކްސީ ކޮންޓްރޯލުން ނެއްޓި، ބާރު ސްޕީޑްގައި ގޮސް ޖެހުނީ މަގު މެދުގައި ހުރި ފުލުހެއްގަ ގައިގަ އެވެ. ޓެކްސީން ޖެހުމާ އެކު އޭނާ ވިއްސައިގެން ގޮސް ވެއްޓޭތީ، އާންމުވެފައިވާ ވީޑިއޯއަކުން ފެނެ އެވެ.
ފުލުހުންގެ ތަރުޖަމާނު އަހުމަދު ޝިފާން ވިދާޅުވީ އެކްސިޑެންޓުވި ފުލުސް މީހާގެ ހާލު ރަނގަޅު ކަމަށެވެ. އޭނާ ވިދާޅުވީ ކާރު ދުއްވަން އިން މީހާ ހައްޔަރުކޮށް، މައްސަލަ ތަހުގީގު ކުރަމުން އަންނަ ކަމަށެވެ.
ޓްރެފިކް ފުލުހުން މަސައްކަތުގައި އުޅެނިކޮށް މީގެ ކުރިން ވެސް އަނިޔާވެފައި އެބަހުއްޓެވެ. އާންމުކޮށް އެފަދަ ހާދިސާތައް ހިނގަނީ ބާރު ސްޕީޑުގައި ދުއްވާފައިދާ އުޅަނދުތައް ހުއްޓުވަން އުޅުމުން، ނުކިޔަމަންތެރިވާ މީހުންގެ ސަބަބުންނެވެ.