ރައްޔިތުންގެ މަޖިލީހުގެ އިންތިހާބުގައި އަމިއްލަ ގޮތުން ވާދަކުރައްވައި އިންތިހާބު ކާމިޔާބުކިރެއްވި ހަ މެމްބަރަކު ސަަރުކާރު ހިންގާ ޕީއެންސީއާ ގުޅިވަޑައިގެންފި އެވެ.
ޕީއެންސީން ބުނީ ރައީސް ޑރ. މުހައްމަދު މުއިއްޒުގެ ހާޒިރުގައި އެ ޕާޓީއަށް ހަ މެމްބަރަކު އިއްޔެ ސޮއިކުރައްވައިފައިވާ ކަމަށެވެ. އެއީ ހުރާ ދާއިރާގެ އިންތިހާބު ކާމިޔާބުކުރެއްވި ޑރ. އަނާރާ ނައީމާއި މަތިވެރި ދާއިރާގެ އިންތިހާބީ މެމްމަަރު ހަސަން ޒަރީރާއި މައްޗަންގޮޅި މެދު ދާއިރާގެ އިންތިހާބީ މެމްބަރު އަހުމަދު ޒަމީރާއި ތިމަރަފުށި ދާއިރާގެ އިންތިހާބީ މެމްބަރު އަހުމަދު ރިޔާޒާއި ނައިފަރު ދާއިރާއިން އިންތިހާބުވި ޔާސީން އަބްދުﷲ އަދި ވިލިނގިލި ދާއިރާއިން އިންތިހާބުވި އާޒިމް އަބްދުލް އަޒީރެވެ.
މި މެމްބަރުން ޕީއެންސީއަށް ސޮއިކުރެއްވުމާ އެކު އަންނަ މަހުގެ 28ގައި ހުވާކުރުމަށް ހަމަޖެހިފައިވާ 20 ވަނަ ރައްޔިތުންގެ މަޖިލީހަށް އިންތިހާބުވެފައިވާ ސަރުކާރުގެ މެމްބަރުންގެ އަދަދު މިހާރު މިވަނީ 76 އަށް އަރައިފަ އެވެ.
އެމް.ޑީ.ޕީން ބޭނުންވެގެން މި މަހު ފުރަތަމަ ދުވަހު މަޖިލީހުން ފާސްކުރި އެންޓި ޑިފެކްޝަން ގާނޫނުގައިވާ ގޮތުން އަމިއްލަ ގޮތުން ވާދަކޮށް މަޖިލީހަށް އިންތިހާބުވާ މެމްބަރަކު އެ ދައުރުގައި ސިޔާސީ ޕާޓީގެ މެމްބަރަކަށް ވެއްޖެ ކަމުގެ މައުލޫމާތު ރައްޔިތުންގެ މަޖިލީހުން އިލެކްޝަންސް ކޮމިޝަނަށް އަންގާ ހިސާބުން އެ މެމްބަރަކު އިސްތިއުފާ ދޭންޖެހޭނެ އެވެ. ނަމަވެސް އެއީ ހުވާކުރުމަށްފަހު އެ މެމްބަރަކާ މެދު އަމަލްކުރަން ޖެހޭ ގޮތެވެ. ހުވާ ކުރުމުގެ ކުރިން އެފަދަ ކަމެއް ވެއްޖެ ހާލަތެއްގައި ކަންތައް ކުރަން ޖެހޭ ގޮތް އެ ގާނޫނުގައި ބުނެފައެއް ނުވެ އެވެ.
އިލެކްޝަންސް ކޮމިޝަންގެ ކުރީގެ ނައިބް ރައީސް އިސްމާއިލް ހަބީބު މިކަމާ މެދު ސުވާލު އުފައްދަވައި އެކްސްގައި ކުރައްވާފައިވާ ޕޯސްޓެއްގައި، އަމިއްލަ ގޮތުން އިންތިހާބުވެފައިވާ މެމްބަރަކު ޕާޓީއަކަށް ސޮއިކޮށްފިނަމަ އެ މެމްބަރަކު ސިޔާސީ ޕާޓީއަކަށް ނިސްބަތްވާ ކަމުގެ މައުލޫމާތު އިލެކްޝަންސް ކޮމިޝަނުން މަޖިލީހަށް ފޮނުވައިފިނަމަ ކަންވާނީ ކިހިނެއްތޯ ސުވާލު ކުރައްވައިފައިވެ އެވެ.
The post މަޖިލީހަށް އަމިއްލަ ގޮތުން ހޮވުނު ހަ މެމްބަރަކު ޕީއެންސީއަށް first appeared on އަދިވެސް އޮންލައިން.
