ފަތުރުވެރިކަމުގެ ދާއިރާގެ ހުރިހާ ފެސިލިޓީތަކަކުން ވެސް ކަނޑައަޅާފައިވާ ވަކި އަދަދަކަށް ބޭންކްތައް މެދުވެރިކޮށް މާރުކުރަން ޖެހޭ ގޮތަށް އަމަލު ކުރަން ފެށި އެމްއެމްއޭގެ ބޭރު ފައިސާއާ ބެހޭ ގަވައިދުގެ ސަބަބުން ގެސްޓްހައުސަށް ނުލިބޭ އަދަދެއް ބޭންކަށް މާރު ކުރަން ޖެހިފައިވާ ކަމަށް ކާނި ހޮޓެލްސްގެ ސީއީއޯ އަދި ނެޝަނަލް ހޮޓެލްސް އެންޑް ގެސްޓްހައުސް އެސޯސިއޭޝަން (އެންއެޗްގޭމް) ގެ ރައީސް އަބްދުﷲ ނަޝީދު (ކާނި އަބްދުﷲ) މިރޭ ވިދާޅުވެއްޖެއެވެ.
އެމްއެމްއޭ އިން އާންމުކުރި އާ ގަވާއިދުގައިވާ ގޮތުން، މި ފިޔަވަޅުތަކަކީ ބޭރު ފައިސާއިން ލިބޭ އާމްދަނީ ރާއްޖޭގައި ހިފެހެއްޓުން ހަރުދަނާކޮށް ބޭރު ފައިސާގެ ލިކުއިޑިޓީ އިތުރުކުރުމުގެ ގޮތުންނެވެ. އޭގައިވާ ގޮތުން ކެޓަގަރީ އޭގެ ގޮތުގައި ހިމެނޭ ފަތުރުވެރިކަމުގެ ރިސޯޓުތަކާއި ހޮޓާތަކާއިި އުޅަނދުތަކުން ކޮންމެ ޓޫރިސްޓަކަށް، ބޮލަކަށް 500 ޑޮލަރުގެ ރޭޓުން، އެ މަހެއްގައި އައިސްފައިވާ ޖުމްލަ ޓޫރިސްޓުންނަށް ޖެހޭ އަދަދު ބޭންކަކަށް ޖަމާކޮށް ރުފިޔާއަށް މާރު ކުރަން ވާނެއެވެ.
Our average price per room per night for 2 pax is USD 100, Normally guests come for 3 to 4 nights. We will get USD 300 to 400 for the room. But we have to exchange USD 1000 for the 2 guests stayed in the room. Do we have to buy from the black market to exchange to the bank???…
— Abdulla Nasheed (@kaaniablo) October 1, 2024
އަދި ކެޓަގަރީ ބީގެ ގޮތުގައި ހިމެނޭ ގެސްޓްހައުސްތަކާއި މީހުން ދިރިއުޅޭ ރަށްރަށުގައި ހިންގާ ހޮޓާތަކުގެ ތެރެއިން 50 ކޮޓަރި ނުވަތަ އެއަށް ވުރެ މަދު އަދަދެއްގެ ކޮޓަރި ރަޖިސްޓްރީކޮށްފައިވާ ތަންތަނުން ކޮންމެ ޓޫރިސްޓަކަށް، ބޮލަކަށް 25 ޑޮލަރުގެ ރޭޓުން އެ މަހެއްގައި އައިސްފައިވާ ޖުމްލަ ޓޫރިސްޓުންނަށް ޖެހޭ އަދަދު ބޭންކަކަށް ޖަމާކޮށް ރުފިޔާ އަށް މާރު ކުރަން ވާނެ ކަމަށް ވެސް އެމްއެމްއޭގެ ގަވައިދުގައި ބުނެފައިވެއެވެ.
ކާނި އަބްދުﷲ "އެކްސް" ގައި ކުރެއްވި ޕޯސްޓެއްގައި ވިދާޅުވީ ގެސްޓްހައުސެއްގައި އާންމުކޮށް ކޮޓަރިއެއް ރެއަކަށް އުޅޭނީ ދެ މީހުންނަށް 100 ޑޮލަރުގެ ރޭޓުގައި ކަމަށެވެ. އާންމުކޮށް ފަތުރުވެރިން ތިނެއް ނޫނީ ހަތަރު ރެއަށް އަންނައިރު، ކޮޓަރިއަށް ލިބޭނީ 300 ޑޮލަރު ނޫނީ 400 ޑޮލަރުގެ އާމްދަނީއެއް ކަމަށް އޭނާ ވިދާޅުވިއެވެ.
"އެކަމަކު އަޅުގަނޑުމެން މި ޖެހެނީ ދެ ފަތުރުވެރިން ކޮޓަރީގައި ތިބީމަ، 1،000 ޑޮލަރު މާރު ކުރަން. އަޅުގަނޑުމެން ޑޮލަރު ބޭންކަށް ދިނުމަށްޓަކައި މާރުކުރަންވީ ކަޅު ބާޒާރުގައި؟" ލޯކަލް ޓޫރިޒަމްގެ ދާއިރާގައި އެންމެ ތަޖުރިބާކާރު ބޭފުޅުންގެ ތެރޭގައި ހިމެނިވަޑައިގަންނަވާ ކާނި އަބްދުﷲ ވިދާޅުވިއެވެ.
އަބްދުﷲ ކުރެއްވި ޕޯސްޓުގެ ތަފްސީދު ދެއްވައި އޭނާ "ވަގުތަށް" ވިދާޅުވީ އެމްއެމްއޭގެ ގަވައިދުގެ ދަށުން 50 ކޮޓަރިއަށް ވުރެ ގިނަ ގެސްޓްހައުސްތައް އިނދަ ޖެހި، އެ ތަންތަން ހުއްޓުމަކަށް އަންނާނެ ކަމަށެވެ. އެއީ ގެސްޓްހައުސަށް ނުލިބޭ އަދަދެއް ބޭންކަށް މާރުކުރަން ޖެހޭނެތީ ކަމަށް އަބްދުﷲ ވިދާޅުވިއެވެ. އަބްދުﷲ ވިދާޅުވި ގޮތުގައި، މާފުށީގައި އޭނާ ހިންގަވާ ހަތަރު ގެސްޓްހައުސަކީ ވެސް 50 ކޮޓަރިއަށް ވުރެ ގިނައިން ހުންނަ ގެސްޓްހައުސްތަކެކެވެ.
އެހެންވެ، އެމްއެމްއޭ އިން ގެޒެޓް ކުރި ގަވައިދު އިސްލާހު ކުރަން ޖެހޭ ކަމަށް ވެސް އަބްދުﷲ ވިދާޅުވިއެވެ.
"ގެސްޓްހައުސްއެއްގައި 50 ކޮޓަރި ހުރުމަކުން ރިސޯޓު ވިއްކާ އަގަކަށް ނޫން ގެސްޓްހައުސް ކޮޓަރިތައް ވިއްކަނީ. އާންމުކޮށް 80 ނޫނީ 100 ޑޮލަރަށް މި ވިއްކަނީ. ވަރަށް ގިނަ ޓޫރިސްޓުން އާދޭ އެއް ރެއަށް ނޫނީ ދެ ރެއަށް. އެހެންވީމަ މި ލިބެނީ 100 ޑޮލަރު ނޫނީ 200 ޑޮލަރު. އެކަމަކު ވެސް 1،000 ޑޮލަރު މާރު ކުރަން ޖެހޭ. އެއީ ކޮޓަރިއަށް އަންނަ ދެ މީހުންގެ ތެރެއިން ބޮލަކަށް 500 ޑޮލަރު ނަގަން އޮތީމަ،" އަބްދުﷲ ވިދާޅުވިއެވެ.
އަބްދުﷲ ވަނީ ގަވައިދު އިސްލާހު ކުރާއިރު، އެންމެ ރަނގަޅު ގޮތަކީ ގެސްޓްހައުސްތަކުން ބޮލަކަށް 25 ޑޮލަރު އެކަނި ނެގުމެވެ. އަދި ޑޮލަރު މާރުކުރުމުގައި ވަކި ގެސްޓްހައުސްއަކާ މެދުގައި ތަފާތު ކުރުން ނުގެންގުޅުމަށް އޭނާ އެދިވަޑައިގެންނެވިއެވެ.
