ކުރީ ސަރުކާރުގެ ބިންވެރިޔާ ސްކީމުގެ ދަށުން ދޫކޮށްފައިވާ ގޯތިތައް ލިބުނު ފަރާތްތަކަށް ތިން މަސް ދުވަހުގެ ތެރޭގައި އެ ގޯތިތައް ހަވާލު ކުރަން ލާޒިމްވާ ގޮތަށް ރާއްޖޭގެ ބިމާ ބެހޭ ޤާނޫނަށް ހުށަހެޅި އިސްލާހް މިއަދު ފާސްކޮށްފިއެވެ.
މަޖިލިހުގެ ގަލޮޅު ދެކުނު ދާއިރާގެ އެމްޑީޕީގެ މެމްބަރު މީކާއިލް އަހުމަދު ނަސީމް މީގެ ދެ މަސް ކުރިން ހުށަހެޅި މި އިސްލާހް މިއަދު ފާސްކޮށްފައި ވަނީ މަޖިލީހާށް ހާޒިރުވި މެންބަރުންގެ ތެރެއިން 35 މެންބަރުންގެ ވޯޓުންނެެވެ. މި އިސްލާހާއި ދެކޮޅަށް ވޯޓު ދިން މެންބަރަކު މިއަދު މަޖިލީސް ޖަލްސާގައި ނެތެވެ.
މީކާއިލް މީގެ ކުރިން ވިދާޅުވިގޮތުގައި މި އިސްލާހު ހުށަހަޅަނީ މާލެއަށް ދިމާވެފައިވާ ބޯހިޔާވަހިކަމަށް ހައްލު ހޯދައި ދިނުމަށް ސަރުކާރުން އެކަށަހަޅާފައިވާ ސިޔާސަތުތަކުގެ ދަށުން މާލޭގެ ރައްޔިތުންނަށް ގޯތި ދިނުމަށްޓަކައި ހިންގި ބިންވެރިޔާ ސްކީމްްގެ ދަށުން އެތައް އަހަރުތަކަކަށްފަހު، މާލެ ސަރަހައްދުން ދޫކުރަން ހަމަޖެހިފައިވާ ބަންޑާރަ ގޯތިތައް، އެ ގޯތިތައް ލިބޭ ފަރާތްތަކުގެ ދާއިމީ ލިސްޓު ގެޒެޓުގައި އާންމު ކުރުމަށްފަހު، އެތައް ދުވަހެއް ފާއިތުވެފައިވީނަމަވެސް ގޯތިތައް ލިބިފައިވާ ފަރާތްތަކަށް ހަވާލު ކޮށްފައި ނުވާތީއާއި އެފަރާތްތަކުން ފާޅު ކުރަމުން އަންނަ ކަންބޮޑުވުންތަކަށް ޤާނޫނީ ގޮތުން ހައްލެއް ހޯދައިދީ، މިފަދަ މައްސަލަތައް ތަކުރާރުވެގެން ނުދާނެކަން ކަށަވަރު ކުރުމަށާއި ބަންޑާރަ ގޯތި ދޫކުރާ އިދާރާތަކުން ގޯތި ލިބޭ ފަރާތްތައް ކަނޑައެޅުމަށްފަހު، އެފަރާތްތަކަށް އަވަސް މުއްދަތެއްގައި ގޯއްޗާއި ގޯތީގެ ރަޖިސްޓްރީ ހަވާލު ކުރަން ޖެހޭ ގޮތަށް ހެދުމަށެވެ.
މީކާއީލް މިޤާނޫނަށް ހުށަހަޅާފައިވާ ފުރަތަމަ އިސްލާހަކީ ދިރިއުޅުމަށް ދޫކުރާ ބަންޑާރަ ގޯތި ލިބޭ ފަރާތްތައް ކަނޑައަޅައި، ގޯތި ލިބޭ ފަރާތްތަކުގެ ދާއިމީ ލިސްޓު ގެޒެޓް ކުރާ ތާރީހުން ފެށިގެން ގިނަވެގެން 6 މަސް ދުވަހުގެ ތެރޭގައި ގޯތި ލިބުނު ފަރާތްތަކަށް އެގޯތި ދޫކުރި ފަރާތްތަކުން ގޯތި ހަވާލު ކުރަން ވާނެ ކަމަށް ހުށަހަޅާ އިސްލާހެވެ.
ދެވަނަ އަށް ހުށަހަޅާފައިވަނީ އެ ޤާނޫނުގެ (ށ) އަށް ހުށަހަޅާފައިވާ އިސްލާހެކެވެ. އެއީ އެޤާނޫނަށް އަމަލު ކުރަން ފަށާއިރު، ބަންޑާރަ ގޯތި ލިބޭ ފަރާތްތައް ކަނޑައަޅައި ގޯތި ލިބޭ ފަރާތްތަކުގެ ދާއިމީ ލިސްޓު ގެޒެޓް ކުރުމަށްފަހު، ހަވާލު ކޮށްފައި ނުވާ ގޯތިތައް، މި ޤާނޫނަށް އަމަލު ކުރަން ފަށާ ތާރީހުން ފެށިގެން 3 މަސް ދުވަހުގެ ތެރޭގައި ގޯތި ލިބުނު ފަރާތްތަކާއި އެ ގޯތި ދޫކުރި އިދާރާއަކުން ހަވާލު ކުރަންވާނެ ކަމަށް ބުނެ ހުށަހަޅާފައިވާ އިސްލާހެކެވެ.
