ނިމިދިޔަ ރޯދަ މަހު އެކަނިވެސް މާލެ ސަރަހައްދުގައި 800 އެއްހާ އެކްސިޑެންޓް ހިނގާފައިވާ ކަމަށް ފުލުހުން ހިއްސާ ކުރި ތަފާސްހިސާބުތަކުން ދައްކައިފިއެވެ.
ކޮންމެ އަހަރެއްގެ ރޯދަ މަހު އެކްސިޑެންޓްތައް ވަރަށް ގިނަ ވެއެވެ. ހާއްސަކޮށް ބައެއް ގަޑިތަކުގައި މާލެ ސަރަހައްދުގެ ޓްރެފިކް ވަރަށް ބާރު ބޮޑު ވެއެވެ.
އެކްސިޑެންޓްތަކުގައި އެތައް ބަޔަކަށް ބޮޑެތި ގެއްލުންތައް ލިބޭއިރު، މުދަލާއި ތަކެއްޗަށްވެސް ގެއްލުންތައް ލިބިގެން ގޮސްފައި ވެއެވެ.
ފުލުހުން މިއަދު އާއްމު ކުރި މައުލޫމާތަށް ބަލާއިރު، މި އަހަރުގެ ރޯދަ މަހު އެކަނި މާލެ ސަރަހައްދުގައި 798 އެކްސިޑެންޓް ހިނގާފައި ވެއެވެ. މިއީ މިދިޔަ އަހަރުގެ މި މުއްދަތާ އަޅާކިޔާއިރު ވަރަށް ބޮޑު އިތުރުވުމެކެވެ. މިދިޔަ އަހަރުގެ މި މުއްދަތުގައި މާލެ ސަރަހައްދުގައި ހިނގާފައި ވަނީ 321 އެކްސިޑެންޓެވެ.
މާލެ ސަރަހައްދުގައި އެކްސިޑެންޓްތައް އިތުރުވެފައިވާއިރު، މާލެ ސަރަހައްދުގެ ޓްރެފިކް ބެލެހެެއްޓުމަށް ފުލުހުން ވަރަށް ގިނައިން ހަރަކާތްތެރިވަމުންދާކަން ފާހަގަކޮށްލެވެއެވެ.
