"އެލީޓް ރަނާސް"އިން ބާއްވާ ހުޅުމާލޭ ރަން ޖޫން މަހަށް ފަސްކޮށްފިއެވެ.
ކުރިން މި އިވެންޓް ބޭއްވުމަށް ނިންމާފައި އޮތީ މި ފެށޭ މެއި މަހުގެ 17 ގައެވެ.
އެލީޓް ރަނާސްއިން ބުނީ ތާރީޚު ފަސްކުރީ މި ރޭހަށް ލިބޭ ތަރުހީބު އިތުރުވުމުގެ ސަބަބުން، އަދިވެސް ގިނަ ފަރާތްތަކަށް މި ރޭހުގައި ބައިވެރިވުމުގެ ފުރުސަތު ދިނުމަށް ކަމަށެވެ.
މީގެ އިތުރުން ތާރީޚު ފަސްކުރުމުން މޫސުން ރަނގަޅު ދުވަހަކާ ދިމާވުމުގެ ފުރުސަތު ބޮޑުވެ، ރޭހަށް ތައްޔާރުވުމަށްޓަކައި ގިނަ ވަގުތު ލިބުމުން އެންމެންނަށް ވެސް އުފާވެރި އަދި ވާދަވެރި މާހައުލެއް ކަށަވަރުކޮށްދޭނެކަމަށް އެލީޓް ރަނާސްއިން ބުންޏެވެ.
އެލީޓް ރަނާސްއިން މައުލޫމާތުދިން ގޮތުގައި މި ރޭހަކީ ހުރިހާ އުމުރެއްގެ މީހުންނަށް ދުވެވޭ ކަހަލަ ރޭހެއް ބޭއްވުމުގެ މަގްސަދުގައި ބާއްވާ ރޭހެކެވެ.
އެ ދުވުމުގެ މެއިން ޕާޓްނަރަކީ އެޗްޑީސީއެވެ. އަދި އެންޖީއޯގެ ގޮތުގައި މަސައްކަތް ކުރުމަށް ހަމަޖެހެފައިވަނީ މަމްސް އެއިޑްއެވެ.
