ކުޅިވަރުގެ ދާއިރާއާއި ސިއްޙީ ދާއިރާއިން މަގްބޫލުކަން ހޯދާފައިވާ ޑރ. ރަމްޝާ ކެންސަރުބަލީގައި ފަރުވާ ހޯދަމުންދަނިކޮށް އަވަހާރަވެއްޖެއެވެ.
ޑރ. ރަމްޝާ އަވަހާރަވުމާއި ގުޅިގެން ގިނަ ބަޔަކުދަނީ އޭނާގެ ޚިދުމަތްތަކާއި ބަލީގެ ހާލަތުގައިވެސް ދެއްކި ހިތްވަރު ފާހަގަކޮށް ތަޢުޒިޔާގެ މެސެޖްތައް ފޮނުވަމުންނެވެ.
އެމްބީބީއެސް ނިންމަވައި މެޑިކަލް އޮފިސަރެއްގެ ގޮތުގައި ސަރުކާރުގެ މައި ހޮސްޕިޓަލް، އައިޖީއެމްއެޗްގައި ޚިދުމަތްކުރެއްވުމަށްފަހު ޑރ. ރަމްޝާ ގަސްތުކުރެއްވީ ކަރުންމަތީގެ ބައްޔަށް ޚާއްސަވުމަށެވެ. ތައިލެންޑްގެ ވެރިރަށް ބެންކޮކްގައި ޚާއްސަވުމަށް ތަޢުލީމު ޙާސިލްކުރަމުންދަނިކޮށް ކެންސަރު ޖެހިފައިވާކަން އެނގުމުންވެސް އެނާވަނީ ފަރުވާ ހޯއްދަވަމުން ކަރުންމަތީގެ ބަލިތަކުގެ ޑޮކްޓަރަކަށްވުމުގެ ކޯސް ފުރިހަމަކުރައްވާފައެވެ.
ޑރ. ރަމްޝާއަކީ ކެންސަރ ސޮސައިޓީ އޮފް މޯލްޑިވްސް އުފެދުނީއްސުރެ އެޖަމިއްޔާއާއި އެޖަމިއްޔާގެ މެންބަރުންނާއި ގާތްގުޅުމެއް ބޭއްވި މެންބަރެކެވެ. އަދި އެފަދަ ބަލިތަކަށް މީހުން ހޭލުންތެރިކުރުމުގައި މުހިއްމު މަސައްކަތްތައްވަނީ ކުރައްވާފައެވެ.
މީގެ އިތުރުން ކޯވިޑްގެ އާލަމީ ވަބާގެ ދުވަސްވަރު ރައްޔިތުން ފުރަބަންދުގައި ތިބިއިރު ރަމްޝާވަނީ ކްލަބް ހައުސްގައި ކޯވިޑަށް މީހުން ހޭލުންތެރިކުރަމަށް މުހިއްމު މަސައްކަތްތަކެއް ކުރައްވާފައެވެ.
މީގެ އިތުރުން ޑރ. ރަމްޝާއަކީ ކުރިން ރާއްޖޭގައި އުފެދުނު އަންހެން ދުވުންތެރިންގެ ތެރެއިން ފާހަގަކޮށްލެވޭ އެތްލީޓެކެވެ. ދުވުމުގައި 800 މީޓަރާއި 1500 މީޓަރުގެ ދުވުމުން ޚާއްސަވި ޑރ. ރަމްޝާ ވަނީ ބޭރުގެ މުބާރާތްތަކުގައި ވެސް ރާއްޖެ ތަމްސީލްކުރައްވައިފައެވެ. ދުވުމުގެ އިތުރުން ރަމްޝާ ވަނީ ނެޓްބޯޅަ ވެސް ގައުމީ ފެންވަރުގައި ކުޅުއްވައިފައެވެ.
