ޑޮނެޓްސްކުގެ އިންސާނީ އެހީދޭ މަރުކަޒަކަށް ހަމަލާދީ ތިން މީހުން މަރާލައިފި

ޔޫކްރެއިނުގެ އިރުމަތީގައިވާ ޑޮނެޓްސްކުގައި ހުންނަ އިންސާނީ އެހީދޭ މަރުކަޒަކަށް ރަޝިޔާއިން ދިން ވަރުގަދަ ރޮކެޓް ހަމަލާތަކެއްގައި ޢާންމުންގެ ތިން މީހުން މަރުވެއްޖެއެވެ. ޑޮނެޓްސްކަކީ ޔޫކްރެއިނުގެ އިރުމަތީގައިވާ ދޮންބާސްގައި އޮންނަ އެއް ސަރަޙައްދެވެ. ރަޝިޔާގެ ހަމަލާތައް އަމާޒުކޮށްފައި ވަނީ ޑޮނެޓްސްކުގެ ރަށެއް ކަމުގައިވާ ކޮސްޓްޔަންޓިނިވްކާއަށެވެ.

މި ހަމަލާގައި އިންސާނީ އެހީދޭ މަރުކަޒަށް ބޮޑެތި ގެއްލުންތަކެއް ލިބުނު ކަމުގައި ކޮސްޓްޔަންޓިނިވްކާގެ އޮފިޝަލުން ވިދާޅުވެއެވެ. ރަޝިޔާގެ މިސައިލް ހަމަލާ އަރާފައިވާ މަރުކަޒަކީ، ޑޮނެޓްސްކުގެ ސަރަޙައްދުތަކުގައި ދިރިއުޅޭ ރައްޔިތުންނަށް އިންސާނީ އެހީތެރިކަން ފޯރުކޮށްދިނުމުގައި އިސްކޮށް ހަރަކާތްތެރިވާ ޖަމުޢިއްޔާއަކުން ބޭނުންކުރާ ޢިމާރާތެކެވެ.

އެ ޖަމުޢިއްޔާއިން ހިންގާ ބައެއް ހަރަކާތްތަކުގެ ތެރޭގައި، ރަޝިޔާއިން ހަމަލާދެމުންދާ ސަރަޙައްދުތަކުގައި ދިރިއުޅޭ ޢާންމު ރައްޔިތުންނަށް ރައްކާތެރި ހިސާބުތަކަށް ބަދަލުވާން އެހީތެރިކަން ފޯރުކޮށްދިނުމާއި، އުމުރުން ދުވަސްވީ މީހުންނާއި ބަލިމީހުން ރައްކާތެރި ހިސާބުތަކަށް ގެންދަން އެހީތެރިކަން ފޯރުކޮށްދިނުން ހިމެނެއެވެ. އަދި، އެ ސަރަޙައްދުތަކުގައި ދިރިއުޅޭ ރައްޔިތުންނަށް ކާބޯތަކެއްޗާއި އެހެނިހެން ޒަރޫރީ ސާމާނު ފޯރުކޮށްދިނުން ހިމެނެއެވެ.

އެ މަރުކަޒަށް ދިން ހަމަލާގައި މަރުވި ތިން މީހުންނަކީ، ބަޚްމުތާއި، ޗެސިވް ޔާރްގެ އިތުރުން އޮޕައިޓްނޭގައި ރަޝިޔާއިން ކުރަމުންދާ ހަނގުރާމައިން ސަލާމަތްވުމަށް އެ ސަރަޙައްދު ދޫކޮށް ދަތުރުކުރަން މަސައްކަތް ކުރާ ތިން އަންހެނުން ކަމުގައި ކޮސްޓްޔަންޓިނިވްކާގެ އޮފިޝަލުން ވިދާޅުވިއެވެ. މީގެ ތެރެއިން އެންމެ ވަރުގަދައަށް ހަނގުރާމަ ހިނގަމުން ދަނީ ބަޚްމުތުގައެވެ.

ކޮސްޓްޔަންޓިނިވްގެ އިތުރުން ރަޝިޔާއިން ވަނީ ޚާރްސަން ސަރަޙައްދަށް ވެސް ވަރުގަދަ މިސައިލް ހަމަލާތަކެއް ދީފައެވެ. މި ހަމަލާތަކުގައި ޢާންމުންގެ އެކަކު މަރުވެފައިވާ ކަމުގައި ޚާރްސަންގެ އޮފިޝަލުން ވިދާޅުވެއެވެ. އަދި، ގިނަ ޢަދަދެއްގެ ބަޔަކު ޒަޚަމުވި ކަމުގައި ވެސް އޮފިޝަލުން ވިދާޅުވިއެވެ. ޚާރްސަންއަކީ ހަނގުރާމައިގެ ކުރީކޮޅު ރަޝިޔާއިން އަތްގަދަ ކުރި ސަރަޙައްދެކެވެ. ނަމަވެސް، ޔޫކްރެއިނު ސިފައިން ވަނީ އެ ރަށް މިނިވަންކޮށްފައެވެ.

2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހު ރަޝިޔާއިން ސިފައިން ޔޫކްރެއިނަށް އަރައި ހަނގުރާމަ ފެށުމުގެ ކުރިން ބަޚްމުތަކީ 80,000 މީހުންގެ އާބާދީއެއް ދިރިއުޅެމުން ދިޔަ ރަށެކެވެ. ނަމަވެސް، މިހާރު އެ ރަށުގައި ތިބީ ވަރަށް މަދު ބަޔެކެވެ. އެ ރަށުގެ 70 އިންސައްތަ ސަރަޙައްދު ރަޝިޔާގެ ކޮންޓްރޯލްގެ ދަށަށް ގެންގޮސްފައިވާ ކަމުގައި ރަޝިޔާއިން ބުނެއެވެ.