ރާއްޖޭގެ އިގުތިސޯދު ޑައިވާސިފައިކުރުމުގެ ގޮތުން ކަނޑުގެ ވަސީލަތްތަކުން ލިބޭ ނަފާ އިތުރުކުރުމުގެ ގޮތުން ރާއްޖޭގެ ހަތަރު އަތޮޅެއްގައި މެރިކަލްޗާ ޒޯނެއް ތަރައްގީކުރުމަށް ރައީސް ޑރ. މުހައްމަދު މުއިއްޒު ނިންމަވައިފިއެވެ.
ރައީސް އޮފީހުން މިރޭ ބުނީ ރައީސް އެ ނިންމުން ނިންމެވީ ރައީސް އޮފީހުގައި އިއްޔެ ބޭއްވި ކެބިނެޓް ބައްދަލުވުމުގައި ކަމަށެވެ. އެ ހުށަހެޅުމަކީ ފިޝަރީޒް މިނިސްޓްރީގެ ފަރާތުން ކެބިނަޓަށް ހުށަހެޅި ކަރުދާހެއް ކަމަށް ރައީސް އޮފީހުން ބުންޏެވެ.
މެރިކަލްޗާގެ ވިޔަފާރިތައް ގާއިމުކުރުމަށްޓަކައި، ހެޗަރީތައް ބިނާކުރުމާއި ހެޗަރީގައި އުފައްދާ ބާވަތްތައް މޫދުގެ މާހައުލުގައި ބޮޑުކުރުމަށް، ފޮރިން އިންވެސްޓްމަންޓުތައް ހިމެނޭގޮތަށް އާންމުކޮށް ހުޅުވާލައިގެން، ވަކި ޒޯނުތަކެއް މެރިކަލްޗާ ތަރައްގީކުރާ ޒޯންތަކެއްގެ ގޮތުގައި ކަނޑައެޅުން ހިމެނޭ ކަމަށް ރައީސް އޮފީހުން ބުންޏެވެ.
މެރިކަލްޗާ ޒޯންތައް ހެދުމަށް ކަނޑައެޅި ސަރަހައްދުތައް:
- ބޮޑުތިލަދުންމަތި (ހދ. އަދި ށ. އަތޮޅު) މެރިކަލްޗާ ޒޯން
- މާޅޮސްމަޑުލު އުތުރުބުރީ (ރ) އަތޮޅު މެރިކަލްޗާ ޒޯން
- މުލަކަތޮޅު (މ) އަތޮޅު މެރިކަލްޗާ ޒޯން
- ކޮޅުމަޑުލު (ތ) އަތޮޅު މެރިކަލްޗާ ޒޯން
އަދި މާލެއަތޮޅު ދެކުނުން، ވާދޫ ކަނޑުއޮޅިން ފެށިގެން ގާތްގަނޑަކަށް ހަތް ކިލޯމީޓަރު ދެކުނުން އޮތް ޖުމުލަ 73 ހެކްޓަރުގެ ފަރުގެ ސަރަޙައްދަކީ ކޮމާޝަލް ސްކޭލެއްގައި ފާނަ އާލާކުރުމުގެ މަސައްކަތް ހިންގުމަށް ހާއްސަކުރާ މޫދުކޮށީގެ ސަރަހައްދެއްގެ ގޮތުގައި ކަނޑައެޅުމާއި މެރިކަލްޗާ ކުރުމަށް ކަނޑައަޅާ ޒޯނުތައް ކުއްޔަށް ދިނުމުގައި އަމަލުކުރާނެ އުސޫލުތަކެއް ކަނޑައެޅުމަށް ވަނީ ނިންމައިފައި ކަމަށް ރައީސް އޮފީހުން ބުންޏެވެ.
