ހަމަނުޖެހުންތައް ނިމުމަކަށް ގެނައުމަށް ކެންޔާ ސަރުކާރުން ވައުދުވެއްޖެ

ގިނަޢަދަދެއްގެ ޢާއްމުން ނިކުމެއް ކުރަމުންދާ މުޒާހަރާގެ ސަބަބުން ހިނގަމުންދާ ހަމަނުޖެހުންތައް ނިމުމަކަށް ގެނައުމަށް ކެންޔާ ސަރުކާރުން ވައުދުވެއްޖެއެވެ.
ކެންޔާގެ ދާޚިލީ ކެބިނެޓް ސެކްރެޓަރީ އަންގާރަ ދުވަހު ވަނީ ސަރުކާރާ ދެކޮޅަށް ކުރަމުންދާ މުޒާހަރާތަކުގެ ސަބަބުން ހިނގަމުންދާ ހަމަނުޖެހުންތަކާއި ފޭރުން ކޮންމެ އަގެއް ދީގެން ވެސް ނިމުމަކަށް ގެންނާނެ ކަމަށް ވިދާޅުވެފައެވެ.
ކިތޫރޭ ކިންޑިކީ ނެރުއްވި ނޫސް ބަޔާނެއްގައި ވިދާޅުވެފައިވަނީ “ހަމަނުޖެހުމާއި ލޫޓުވުންތަކާއި ވައްކަން ކުރުން ހުއްޓާލަން ޖެހޭ” ކަމަށެވެ.
ކެންޔާގެ ނޭޝަނަލް ކޮމިޝަން އޮން ހިއުމަން ރައިޓްސް (ކޭއެންސީއެޗްއާރް) އިން ނެރުނު ރިޕޯޓެއްގައި ވާގޮތުން ޓެކްސް ބޮޑުކުރަން ރާވާފައިވާ ކަމަށް ބުނެ ޖޫން މަހުގެ 18 ވަނަ ދުވަހު ފެށި މުޒާހަރާތަކުގައި މިހާތަނަށް 39 މީހުން ވަނީ މަރުވެފަ އެވެ.
ދައުލަތުގެ ޚަރަދުގައި ހިންގާ ނަމަވެސް މިނިވަން އިންސާނީ ހައްގުތަކަށް މަސައްކަތްކުރާ އިދާރާއިން ބުނީ ގިނަ މީހުން މަރުވެފައިވަނީ މުޒާހަރާގެ ބައިވެރިންނަށާއި ބައެއް އާންމުންނަށް ދިން ބަޑީގެ ހަމަލާތަކުގެ ސަބަބުން ކަމަށެވެ.
“ގާނޫނު ތަންފީޒުކުރާ އޮފިސަރުން ގާނޫނާ ހިލާފަށް އަމަލުކޮށްފައިވާ ކަމަށް ބުނާ ވާހަކަތައް ތަހުގީގުކޮށް އެކަށީގެންވާ ފިޔަވަޅު އަޅާނެ،” ކިންޑިކޭ ވިދާޅުވި އެވެ.
ފުރާނަ ގެއްލި، އެތައް ބިލިއަން ޝިލިންއެއްގެ މުދާ ހަލާކުވެ، ނުވަތަ ފޭރިގަނެ، ރައްޔިތުންގެ މަޖިލީހުގެ އިމާރާތްތައް އަންދާލަން މަސައްކަތް ކުރި ކަން ގަބޫލުކޮށް، ގާނޫނު ތަންފީޒުކުރާ ފަރާތްތަކުން ޕްރޮފެޝަނަލިޒަމާއި ކެތްތެރިކަމަށް ސަރުކާރުން ތައުރީފު ކުރި އެވެ.
“މިއަދުގެ މުޒާހަރާތަކުގައި އެކި އެކި ކުށްވެރިންގެ ބޮޑެތި މުދާތައް ހަލާކުކޮށްލި އިރު، ރާއްޖޭގެ އެކި ކަންކޮޅުތަކުގައި ސަލާމަތީ ބާރުތަކުން ވަނީ މުޒާހަރާކުރުމުގެ ނަމުގައި ޖިނާއީ އަމަލުތައް ހިންގަމުންދާ ކަމަށް ތުހުމަތުކުރެވޭ މީހުން އެކަހެރިކޮށް އެ މީހުން ފުލުހުންގެ ބެލުމުގެ ދަށަށް ގެންގޮސްފައި،” ޑައިރެކްޓްރޭޓް އޮފް ކްރިމިނަލް އިންވެސްޓިގޭޝަންސް (ޑީސީއައި) އިން ނެރުނު ބަޔާނެއްގައި ބުނެފައިވެއެވެ.
“ނައިރޯބީ އާއި އެ ސަރަހައްދުގެ ވަށައިގެންވާ ސަރަހައްދުން 204 މީހަކު، ގޮނޑުދޮށު ސަރަހައްދުން 35 މީހުން، ނިޔާންޒާއިން 18 މީހުން އަދި ރިފްޓް ވެލީ އަދި އިރުމަތީ ސަރަހައްދުން 11 މީހަކު އަދި ހަތަރު މީހަކު ވަނީ ހިފަހައްޓާފައި،” އެ ބަޔާނުގައި ވެ އެވެ.
ފިނޭންސް ބިލް 2024 އާ ގުޅިގެން ކެންޔާގައި ބޮޑެތި ހަމަނުޖެހުންތަކެއް އުފެދިފައިވާތީ ސަލާމަތީ ކަންކަން ވަނީ ވަރުގަދަކޮށްފަ އެވެ.
ކެންޔާގެ ރައީސް ވިލިއަމް ރޫޓޯ ވަނީ މިދިޔަ ބުދަ ދުވަހު އާންމުންގެ ޕްރެޝަރަށް ބަލައި ބިލުގައި ސޮއި ނުކުރައްވާނެ ކަން އިއުލާން ކުރައްވާފަ އެވެ. ނަމަވެސް އޭނާގެ އިސްތިއުފާއަށް ގޮވާލައި ގިނަ ބަޔަކު ދަނީ ސަރުކާރާ ދެކޮޅު މުޒާހަރާތަކަކަށް ބަދަލުވެފަ އެވެ.
އަސްކަރީ ވެހިކަލްތަކާއި އާމާޑް ޕަރސަނަލް ކެރިއަރުތަކުން ނައިރޯބީ ޕެޓްރޯލް ކުރަމުން އަންނައިރު، ހަތިޔާރު އެޅި ސިފައިން ވަނީ ހަމަނުޖެހުންތަކާއި ފޭރުމާއި ގެއްލުންހުއްޓުވުމަށް ފުލުހުންނަށް އެހީތެރިކަން ފޯރުކޮށްދީފައެވެ.