މި ސަރުކާރުގެ މިނިސްޓަރުންގެ ތެރެއިން އިދިކޮޅު ފަރާތްތަކުގެ ލޯ އެންމެބޮޑަށް އަމާޒުވާ އެއް މިނިސްޓަރަކީ ޓޫރިޒަމް މިނިސްޓަރު އިބްރާހިމް ފައިސަލްއެވެ. ހާއްސަ ގޮތެއްގައި މިނިސްޓަރު ފައިސަލް ޕޯޑިއަމަށް އަރައި އިނގިރޭސިބަހުން ދައްކަވާ ވާހަކަފުޅުތަކަށް އެ ބޭބޭފުޅުން ހާއްސަ ސަމާލުކަމެއް ދެއްވައެވެ.
އެންމެފަހުން ދުބާއީގައި ބޭއްވި ޓޫރިޒަމް އިވެންޓެއްގެ ތެރެއިން އިންޑިއާގެ މީޑިއާތަކަށް ދެއްވި ބަސްދީގަތުންވެސް ވެގެންދިޔައީ އިދިކޮޅު ސިޔާސީ ލީޑަރުންނަށް ވަރަށްބޮޑު ޖޯކަކަށްވެގެން ދިޔަ ކަމަކަށެވެ. މިނިސްޓަރު ފައިސަލްގެ މި އިންޓަވިއުއާ ގުޅިގެން އިދިކޮޅު ސިޔާސީ ބައެއް ފަރާތްތަކުން މިނިސްޓަރުގެ އިނގިރޭސި ބަސްމޮށުންތެރިކަމާ ގުޅޭގޮތުން ތަފާތު ވާހަކަތައް ދައްކަމުން ދިޔައެވެ. މީގެ ތެރެއިން ޓޫރިޒަމް މިނިސްޓަރު ފައިސަލްގެ އެބާވަތުގެ ކަންކަން އެންމެ ގާތުން ބައްލަވާ ހަޖޫޖަހަމުން ގެންދަވާ ކުރީގެ ޔޫތް މިނިސްޓަރު އަދި ކުރީގެ ރައީސް ޔާމީނުގެ ސިޔާސީ ޕާޓީގެ އިސް ހަރަކާތްތެރިޔާ،. މުހައްމަދު މަލީހް ވަނީ ބައިނަލްއަޤްވާމީ ފަތުރުވެރިކަމުގެ ފެއާތަކުގައި ރާއްޖޭގެ ޓޫރިޒަމް މިނިސްޓަރުގެ ހައިސިއްޔަތުން ފައިސަލް ދެއްވާ އިންޓަވިއުތަކާއި ޕޯޑިއަމްތަކަށް އަރާ ދައްކަވާ ވާހަކަތަކުގެ ސަބަބުން ރާއްޖޭގެ އަގު ވެއްޓިގެންދާކަމަށް މާނަ ދޭހަވާ މޭރުމަކުން އެކްސްގައި ވާހަކަ ދައްކަވާފައެވެ.
މިގޮތުން ޓޫރިޒަމް މިނިސްޓަރަކަށް ފައިސަލް އައްޔަނުކުރިގޮތަށް ފޮރިން މިނިސްޓަރަކަށް އައްޔަނުކުރަން އެންމެ އައުލާކަން ބޮޑުވެގެންވަނީ ފައިސަލްގެ ބައްޕަ ޢަބްދުއްރަހީމް އަބްދުﷲ (އަދުރޭ) ކަމަށް މަލީހް ވަނީ ވިދާޅުވެފައެވެ.
Congratulations Dr.Muizz. Definitely the whole tourism industry is talking about your government & your governance. Adhurey Jr. is making you proud at international arena. Adhurey would be a perfect fit for Foreign Affairs.https://t.co/xmFV4uWaeT
— Mohamed Maleeh Jamal (@maleehjamal) May 9, 2024
ޓޫރިޒަމް މިނިސްޓަރު އިބްރާހިމް ފައިސަލް އާ ގުޅޭގޮތުން އިދިކޮޅު ފަރާތްތަކުން ކޮޅުނެތްކޮޅަށް ހަޖޫ ޖަހަމުން ގެންދިޔަނަމަވެސް މިނިސްޓަރު ފައިސަލް މިހާތަނަށްވެސް ހުންނެވީ ހަނެވެ. ނަމަވެސް މިނިސްޓަރު ފައިސަލް މިއަދު ހުކުރަށް ދިއުމަށް ގެއިން ނިކުމެ ވަޑައިގެންނެވުމުގެ ކުރިން ވަނީ މަލީހް ކުރެއްވި ޕޯސްޓަކާ ގުޅުވައިގެން އެކްސްއަށް މެސެޖެއް ދޫކޮށްލައްވާފައެވެ. މި މެސެޖްގައި މިނިސްޓަރު ފައިސަލް ވަނީ މަލީހް ކައިރިން މިހާތަނަށް ދިޔަ ސަރުކާރުތަކުގައި މިނިސްޓަރު ކަމުގައި ހުންނެވިއިރު ވަކި މޮޅުކަމެއް ކުރެއްވިފައިވޭތޯ ސުވާލު ކުރައްވާފައެވެ.
މަލީހް މަތީ ތައުލީމް ހާސިލްކުރެއްވީ އެމެރިކާއިންނެވެ. އޭނާއަކީ ޓޫރިޒަމް ދާއިރާގައި ގިނަ ދުވަހު މަސައްކަތް ކުރެއްވި، އެދާއިރާގެ ތަޖުރިބާކާރެކެވެ. މަލީހަށް ނިސްބަތްކުރައްވައި މިނިސްޓަރު ފައިސަލް ވިދާޅުވެފައިވަނީ، މޮޅެތި މީހުންނަކީ އަނެކާއަށް އިހުތިރާމް ކުރާ މީހުން ކަމަށެވެ. އެމަނިކުފާނާ ގުޅުވައިގެން ކޮންމެ ގޮތަކަށް ވާހަކަ ދެއްކެވި ނަމަވެސް ފަހަތަށް ޖެހިވަޑައިގަތުމެއް ނެތްކަމަށާއި، މަލީހް އަދި ޖަމީލަށްވެސް މިއަދު އޮތީ މިއަދުގެ ސިޔާސީ ހަޤީޤަތް ގަބޫލުކުރައްވައިގެން ތިއްބެވުން ކަމަށެވެ.
Hurihaa sarukaarehga ministarukamuga vaki molhu kameh kurevunutho? Alhugandu mee enme molhu meehaa kamakah nubunan. Molhethi meehun akee anekaa ah ihthiraamkuraa meehun. jameel adhi maleehah ves othee miadhu ge siyaasee hageegah gaboolukurun. Thihen adhi fahathakah nujehseyne
https://t.co/YQGk97gMtF
— Ibrahim Faisal (@lasiaF969) May 10, 2024
މިނިސްޓަރު ފައިސަލް ވިދާޅުވީ ތެދުފުޅެކެވެ. ޕޯޑިއަމްތަކުގައި އިނގިރޭސިބަހުން ދައްކަވާ ވާހަކަފުޅުތަކާއި ގުޅިގެން އިދިކޮޅު ފަރާތްތަކުން ކިތަންމެ ވަރަކަށް ހަޖޫޖެހި ނަމަވެސް، ފަސް އެނބުރި ބެލުމެއްނެތި އެމަނިކުފާނު ވަޑައިގަންނަވަނީ ކުރިއަށެވެ. އަދި އެހެނެއް ކަމަކު ދެއްވާ ބަސްދީގަތުންތައް ދިވެހި ބަހަށް ބަދަލެއް ނުކުރައްވައެވެ. އަދި ބަދަލުގައި އެކަން އެހެން މީހަކަށްވެސް މަތި ނުކުރައްވައެވެ.
The post މިނިސްޓަރު ފައިސަލް ހުކުރަށް ވަޑައިގެންނެވުމުގެ ކުރިން ދޫކޮށްލެއްވި މެސެޖް: އެންމެ މޮޅު މީހާއަކީ އަނެކާއަށް އިހުތިރާމްކުރާ މީހާ first appeared on Minivan.
