މި އަހަރުގެ ފުރަތަމަ ހަ މަސް ދުވަހު ފެމިލީ ކޯޓަށް ހުށަހެޅި މައްސަލަތަކުގެ 99 ޕަސެންޓު މައްސަލަ ނިންމި ކަމަށް އެ ކޯޓުން ބުނެފި އެވެ.
ފެމިލީ ކޯޓުން އާންމުކޮށްފައިވާ ފުރަތަމަ ހަ މަސް ދުވަހުގެ ތަފާސްހިސާބުތަކުން ދައްކާ ގޮތުން މި އަހަރުގެ ޖުލައި މަހުގެ ނިޔަލަށް އެ ކޯޓަށް 1،073 މައްސަލައެއް ވަނީ ހުށަހަޅައިފަ އެވެ. އޭގެ ތެރެއިން 1،065 މައްސަލައެއް ބަލައި ނިންމި އެވެ.
އެ މުއްދަތުގައި އެ ކޯޓުން ކޮށްދިން ކައިވެނީގެ އަދަދަކީ 1،121 އެވެ، ރާއްޖެ އިން ބޭރުގައި ކުރި 89 ކައިވެންޏެއް ކޯޓުގައި ރަޖިސްޓަރީ ކޮށްދިނެވެ. މި އަހަރުގެ ފުރަތަމަ ހަ މަސް ތެރޭގައި ވަރީގެ 594 މައްސަލައެެއް ވެސް ނިންމި އެވެ.
މި އަހަރުގެ ފުރަތަމަ ހަ މަސް ދުވަހަށް ބަލާއިރު، ފެމިލީ ކޯޓުން ވަނީ އަނބިދަރީންގެ ހަރަދާއި އިއްދައިގެ ގޮތުގައި 38.4 މިލިއަން ރުފިޔާ ސާބިތުކޮށްފަ އެވެ. އެހެނިހެން ގަޒިއްޔާތަކާ ގުޅިގެން 23 މިލިއަނަށް ވުރެ ގިނަ ރުފިޔާ ކޯޓަށް ބަލައިގަނެ، އެ ލިބެން ޖެހޭ މީހުންނަށް ރައްދު ކޮށްދީފައިވާ ކަމަށް ވެސް ބުންޏެވެ.
އާއިލީ މައްސަލަތަކާ ބެހޭ ބަޔަށް މިދިޔަ ހަ މަސް ތެރޭގައި 107 މައްސަލައެއް ހުށަހެޅިއިރު 60 މައްސަލައަކަށް ސުލްހަވެރި ހައްލެއް ހޯދައިދިން ކަމަށާއި ގެވެށި އަނިޔާ އާއި ކުޑަކުދިން ރައްކާތެރިކުރުމުގެ 47 އަމުރެއް މި މުއްދަތުގައި ނެރެފައިވާ ކަމަށް ކޯޓުން ބުންޏެވެ.
