ދެ ސަރަހައްދަކުން މިހާތަނަށް އިންޑިއާގެ 51 ސިފައިން އަނބުރާ ގައުމަށް ގޮސްފައިވާ ކަމަށް ސަރުކާރުން މިއަދު ބުނެފި އެވެ.
ރައީސް އޮފީހުގައި ބޭއްވި ނިއުސް ކޮންފަރެންސްގައި، ނޫސްވެރިއެއްގެ ސުވާލަކާ ގުޅިގެން ޗީފް ސްޕޯކްސްޕާސަން ހީނާ ވަލީދު ވިދާޅުވީ ދެ ތަނަކުން ބޭރުގެ ޖުމްލަ 51 ސިފައިން މިހާތަނަށް އިންޑިއާއަށް ފޮނުވާލާފައިވާ ކަމަށެވެ. އަދި އަންނަ ހުކުރު ދުވަހުގެ ކުރިން ބާކީ ތިބި ސިފައިން އަނބުރާ ދާނެ ކަމަށް އޭނާ ވިދާޅުވި އެވެ.
"މެއި މަހުގެ 10 ވާއިރަށް ރާއްޖޭގައި ތިބި ހުރިހާ ސިފައިން ފައިބައިގެން ދާނެ. މިހާތަނަށް ދެ ޕްލެޓްފޯމަކުން 51 ސިފައިން ފައިބައިގެން ދިޔައީ." ހީނާ ވިދާޅުވި އެވެ.
އިންޑިއާ ސިފައިންގެ ފުރަތަމަ ބެޗު ރާއްޖެ ދޫކޮށް ދިޔައީ މިދިޔަ މާޗު މަހުގެ ކުރީކޮޅެވެ. އަދި ދެވަނަ ބެޗު ފުރީ މިދިޔަ މަހު އެވެ.
ސަރުކާރުން ކުރިން ބުނެފައިވާ ގޮތުގައި ރާއްޖޭގައި އިންޑިއާގެ 89 ސިފައިންގެ މީހަކު ތިއްބެވެ. ނަމަވެސް، އެއީ އެހާތަނަށް ކަށަވަރުކުރެވުނު އަދަދު ކަމަށް ސަރުކާރުން ވަނީ ބުނެފަ އެވެ.
ހީނާ ވިދާޅުވީ ހުރިހާ ސިފައިން ފައިބައިގެން ދިއުމުން، ރާއްޖޭގައި ތިބި ބޭރުގެ ސިފައިންގެ އަދަދު ހާމަކުރާނެ ކަމަށެވެ.
