ގިނަ ދުވަސްތަކެއް ވަންދެން މެދުކެނޑިފައި އޮތުމަށްފަހު، ދީނީ އިލްމުވެރިންގެ މަހާސިންތާ މިރޭ އަލުން ފެށުމަށް ހަމަޖެހިއްޖެއެވެ. އިސްލާމީ ކަންތައްތަކާބެހޭ ވުޒާރާއިން މަޢުލޫމާތު ދެއްވާފައިވާ ގޮތުގައި، މި މަހުގެ 23 އަދި 24 ވަނަ ދުވަހު އިސްލާމީ މަރުކަޒުގެ ޖަލްސާކުރާ މާލަމުގައި ބޭއްވޭ މި މަހާސިންތާގައި ރާއްޖޭގެ ގިނަ އަދަދެއްގެ ދީނީ އިލްމުވެރިން ބައިވެރިވެވަޑައިގަންނަވާނެއެވެ.
މަހާސިންތާގެ ފެށުމުގެ ރަސްމިއްޔާތުގައި އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވާހަކަފުޅު ދެއްކެވުމަށް ހަމަޖެހިފައިވެއެވެ. ވަޒީރު ޑރ. ޝަހީމް ވިދާޅުވެފައިވަނީ، މި މަހާސިންތާގައި މުހިންމު އެކި ކަންކަމާ މެދު އިލްމުވެރިންގެ މެދުގައި މަޝްވަރާ ކުރެވޭނެ ކަމަށެވެ. އަދި ބޭރުގެ ބައެއް ބޭފުޅުންވެސް މި މަހާސިންތާގައި ތަޤްރީރު ކުރައްވާނެ ކަމަށް އޭނާ ހާމަކުރެއްވިއެވެ.
މި އަހަރުގެ މަހާސިންތާގެ ޝިޢާރަކީ "އިސްލާމީ އިންތަކާއި މިންތައް ހިމާޔަތް ކުރުމުގައި އިލްމުވެރިންގެ ދައުރު" އެވެ. މި ޝިޢާރުގެ ދަށުން، އިސްލާމީ އަޤީދާ ހިމާޔަތްކުރުމާއި، މުޖުތަމަޢުގެ އަޚްލާޤީ މިންގަނޑުތައް ހިފެހެއްޓުމުގައި ދީނީ އިލްމުވެރިންގެ ދައުރާ ގުޅޭ ގޮތުން މަޝްވަރާކުރެވޭނެ ކަމަށް ބެލެވެއެވެ.
މި މަހާސިންތާ އަލުން ފެށުމާއެކު، ދީނީ އިލްމުވެރިންނަށް އެއްތަނެއްގައި އެއްވެ، މުހިންމު މައުޟޫޢުތަކާ މެދު ޚިޔާލު ބަދަލުކޮށް، ގޮންޖެހުންތަކަށް ޙައްލު ހޯދުމަށް މަގުފަހިވެގެންދާނެ ކަމަށް މިނިސްޓްރީން ބުނެފައި ވެއެވެ.
The post ދީނީ އިލްމުވެރިންގެ މަހާސިންތާ މިރޭ އަލުން ފަށަނީ first appeared on Khabaru Online.
