ކުދިބޮޑު ގިނަބަޔަކު އިންތިޒާރުކުރަމުން އަންނަ ފިލްމު "ރޮބޯމޭން – ދަ މޫވީ" ގެ ޓިކެޓް ބައްލަވައިގަންނަން ބޭނުންވާ ފަރާތްތަކަށް މިހާރު ޓިކެޓް ބުކް ކުރެވޭނެ އެވެ. ރޮބޯމޭން ދަ މޫވީ ރިލީޒްކުރުމަށް ހަމަޖެހިފައިވަނީ 26 ސެޕްޓެމްބަރުން ފެށިގެން އޮލިމްޕަސް ސްކްރީނުގަ އެވެ. މި ފިލްމުގެ ޓިކެޓް ބުކް ކުރަން ބޭނުންވާ ފަރާތްތަކުން 7656000 ނަމްބަރަށް ގުޅައިގެން މިހާރު ޓިކެޓް ބުކް ކުރެވޭނެ އެވެ.
ރޮބޯމޭން އަކީ ފާއިތުވި އަހަރުތަކުގައި ގިނަ ދިވެހިންގެ މަގްބޫލުކަން ހޯދާފައިވާ ހުނަރުވެރި ތަރިއެކެވެ. ޚާއްސަކޮށް ކުޑަކުދިންގެ ހިތުގައި ރޮބޯމޭންވަނީ ހާއްސަ ޖާގައެއް ހޯދާފަ އެވެ. ރޮބޯމޭން ދަ މޫވީގެ އޮޑިޝަންގައިވެސްވަނީ 100 އަށް ވުރެން ގިނަ ކުދިން ބައިވެރިވެފަ އެވެ. މިދިޔަ މަހު ވަނީ މި ފިލްމުގައި ހަރަކާތްތެރިވާ ތަރިން، ފިލްމުގެ ޕޯސްޓަރު އަދި ފިލްމުގެ ޓްރެއިލާ ރިލީޒްކޮށްފަ އެވެ.
މީޑިއާނެޓުގެ އެމް އޮޖިނަލްސް ބެނާގެ އުފައްދާ މި ފިލްމަކީ އޯކޭޒް އިންކް އަދި މީޑިއާނެޓުގެ ވީޑިއޯކްލަބްގެ ފަރާތުން އުފައްދާ ފިލްމެކެވެ. މި ފިލްމުގެ ޝޯވްތައް އޮލިމްޕަސް ސްކްރީނުގައި އެޅުވުމަށް ހަމަޖެހިފައިވަނީ މެންދުރުފަހު އެވެ. އެއީ ވީހާވެސް ގިނަ ކުޑަކުދިންނަށް ފިލްމު ބަލާލުމުގެ ފުރުސަތު ދިނުމުގެ ގޮތުންކަމަށް ފިލްމު އުފައްދާ ފަރާތުން މައުލޫމާތުދެ އެވެ.
މި ފިލްމާ ބެހޭ އެންމެ ފަހުގެ މައުލޫމާތާއި ފިލްމުގެ ބައެއް މަންޒަރުތައް ފޭސްބުކް އަދި އިންސްޓަގްރާމް މެދުވެރިކޮށް ބެލުންތެރިންނަށް ލިބޭނެއެވެ. ރޮބޯމޭން ދަ މޫވީ އަށް ޚާއްސަ ސޯޝަލް މީޑިއާ ޕޭޖެއްވަނީ ތައާރަފްކޮށްފަ އެވެ.
