އައިޑީ ކާޑާއި ޕާސްޕޯޓް މިހާރު ބޭނުންކުރެވޭ މުއްދަތަކީ އެންމެ އެކަށީގެންވާ މުއްދަތު ނޫން ކަމަށް ބުނެ ގަލޮޅު އުތުރު ދާއިރާގެ މެންބަރު އީވާ އަބްދުﷲ ވަނީ މަޖިލީހަށް މައްސަލައެއް ހުށަހަޅުއްވާފަ އެވެ.
އެ މައްސަލަ ދިރާސާ ކުރާ މަޖިލީހުގެ ގައުމީ ތަރައްގީ އާއި ތަރިކައިގެ ކޮމިޓީގެ މިއަދުގެ ބައްދަލުވުމުގައި ޑީއެންއާރާއި ހަވާލުވެ ހުންނެވި ހޯމްލޭންޑް މިނިސްޓްރީގެ ސްޓޭޓް މިނިސްޓަރު ޔޫސުފް ޢަބްދުލްގަފޫރު ވިދާޅުވީ ކުއްޖާ އުފަންވުމުން ތައްޔާރުކުރާ ފުރަތަމަ އައިޑީކާޑުގެ މުއްދަތަކީ 10 އަހަރު ކަމަށެވެ.
"އެއަށްފަހު 10 އަހަރާއި 40 އަހަރާއި ދެމެދު (މީހުންގެ) ކާޑުގެ މުއްދަތު މި އޮންނަނީ ފަސް އަހަރުން ފަސް އަހަރުން އާކުރާ ގޮތަކަށް. އަދި 40 އަހަރުވުމަށްފަހު ކާޑު އަނެއްކާވެސް ބަދަލުވަނީ 10 އަހަރަށް،" ޔޫސުފް ވިދާޅުވި އެވެ.
އުމުރުން 65 އަހަރުން މަތީގެ މީހުންގެ އައިޑީކާޑުގެ މުއްދަތު ހަމަނުވާ ގޮތް ހަދަން ނިންމީ، މިހާރު އޮންނަ ގޮތުން ދޮށީ އުމުރުގެ ބައެއް މީހުންގެ އައިޑީކާޑު މުއްދަތު ހަމަވެ އާ ކުރުމަށް ދަތިތަކާ ކުރިމަތިވާ ކަމުގެ ޝަކުވާތައް ލިބެމުން ދާތީ ކަމަށް އޭނާ ވިދާޅުވި އެވެ.
ކޮމިޓީގެ މެންބަރުން ވަނީ އެ ގޮތަށް އަމަލުކުރަން ފެށޭނީ ކޮން އިރަކުންތޯ ސުވާލު ކުރައްވައިފަ އެވެ.
އެކަމާ ގުޅިގެން ޔޫސުފް ވިދާޅުވީ، ޑިޕާޓްމެންޓް އޮފް ރެޖިސްޓްރޭޝަނުން މިކަމުގައި ފަންނީ ގޮތުން ބަލަން ޖެހޭ ކަންކަން ބެލުމަށް ފަހު، ކަރުދާހެއް ތައްޔާރުކޮށް މިހާރު ކެބިނެޓަށް ފޮނުވާފައިވާ ކަމަށެވެ.އޭނާ ވިދާޅުވީ މި ކަމުގައި އިތުރަށް ގޮތެއް ނިންމާނީ ކެބިނެޓުން ކަމަށެވެ.
