އެމްއެންޕީން ނެރުނު ބަޔާނެއްގައި ބުނީ، ޝަރީއަތް ނިމެންދެން މީހުން ބަންދުކުރުމުގެ ސަގާފަތެއް ރާއްޖޭގެ ކޯޓުތަކުން ކުރިއަށްގެންދާތީ އެ ސަގާފަތަށް ނިމުމެއް ގެންނަން ޖެހޭ ކަމަށެވެ. އަދި ޝަރީއަތް ނިމެންދެން ބަންދުކޮށް ފަރާތްތަކުގެ މައްސަލަތައް އަވަހަށް ނިންމެމުށާއި، ޖިނާއީ އިޖުރާއަތުގެ ގާނޫނުގެ 60 ވަނަ މާއްދާގެ (ވ) ގައި ކަނޑައަޅާފައިވާ އިޖުރާއަތް ހިންގޭނެ ފަހި އިންތިޒާމްތަކެއް ފަނޑިޔާރުގެއަށް ފަހިކޮށްދެއްވައިގެން، ބަންދުގައިވާ މީހުންނަށް އިޖުރާއީ އިންސާފު ލިބޭނެ ގޮތް ހަމަޖައްސަވާ ދެއްވުން އެދި އެ ޕާޓީން ރައީސް އަށް ށަހަޅާފައިވާ ކަަމަށް އެ ބަޔާނުގައި ވެއެވެ.
މިމައްސަލާގައި އެމްއެންޕީން ފޮނުވި ސިޓީގައި ބުނެފައިވަނީ ޝަރީއަތް ނިމެންދެން ބަންދުކުރެވިފައި ގާތްގަނޑަކަށް 343 މީހަކު ޖަލުތަކުގެ ހައްޔަރުގައި ތިބިއިރު ޖިނާއީ އިޖުރާއަތުގެ ގާނޫނުގެ 60 ވަނަ މާއްދާގެ (ވ) ގެ ދަށުން އެ ފަރާތްތަކުގެ ބަންދު ކޮންމެ 30 ދުވަހަކުން މުރާޖައާ ކުރުމުގެ އަޑުއެހުން ފަނޑިޔާރުގޭގައި ނުހިނގާތީ ހުރިހާ ފަރާތްތަކަށް އެވަނީ އިޖުރާއީ އިންސާފު ލިބުމުގެ މަގު ބަންދުވެފައި ކަމަށެވެ.
އަދި، އޭގެ ތެރެއިން ބައެއް މިހުންގެ ޝަރީޢަތް ނުހިނގާ އަހަރުތަކަކަށް ދިގުދެމިގެން ގޮސްފައިވާ ކަމަށާއި، ބޮޑު މައްސަލައަކަށް ތުހުމަތުކުރެވުމަކީ އިޖުރާއީ އިންސާފުން މީހުން އެއްފަރާތް ކުރެއްވޭނެ ޤާނޫނީ ހަމައެއް ނޫން ކަމަށް ފާހަގަކޮށްފައި ވެއެވެ."ވާނުވާ" ޖަހާފައިވާ މީހުންގެ މައްސަލައާ ގުޅިގެން މާޗް 7 ގައި ރައްޔިތުންގެ މަޖިލީހުގައި ދާހިލީ ވަޒީރާ ސުވާލު ކުރެއްވުމުން ވެސް މީގެ އަސްލު މައްސަލަ ހައްލު ކުރެއްވުމަށް އެއްވެސް މަސައްކަތެއް ކުރެއްވި ވާހަކައެއް ވިދާޅުނުވާ ކަަމަށްވެސް ސިޓީގައިވެއެވެ. އަދި ޕްރޮސެކިއުޓަރ ޖެނެރަލް މި ފަހުން ބޭއްވި ނޫސް ކޮންފެރެންސެއްގައި މި މައްސަލައާ ގުޅިގެން ނާއުންމީދު ވާހަކަފުޅުތަކެއް ދައްކަވާފައިވާކަން ފާހަގަކޮށް އެކަމުން ދޭހަކޮށް ދެނީ ބާރު ހިނގާ ދައުލަތެއްގެ އިންތިޒާމް ދާން ނުޖެހޭހާ ދެރަވަރު ހާލަތަކަށް ގޮސްފައިވާކަން ކަމަށް އެމްއެންޕީން ބުނެފައިވެއެވެ.
މި ސަރުކާރު ވުޖޫވެގެން އައީ "ވާނުވާ" މައްސަލާގައި ކުރީ ސަރުކާރަށް ވަރަށް ބޮޑަށް ފާޑުކިޔަމުންނެވެ. "ވާނުވާ" ޖެހުން ހުއްޓުވާ މައްސަލައަށް ހައްލު ހޯދާ ދިނުމަކީ މި ސަރުކާރުގެ ވައުދެކެވެ. ނަމަވެސް އެ ވައުދާއި ގުޅިގެން މިހާތަަނަށް އެއްވެސް ކަމެއް ކޮށްފައެއް ނުވެއެވެ.
