ޣައްޒާ، ޔޫކްރެއިން މަޝްވަރާއަށް ބްލިންކެން އިނގިރޭސި ވިލާތަށް

އެމެރިކާގެ ހާރިޖީ ވަޒީރު އެންޓަނީ ބްލިންކެން ރަސްމީ ދަތުރެއްގައި މާދަމާ އިނގިރޭސި ވިލާތަށް ވަޑައިގަންނަވަން ހަމަޖައްސަވައިފިއެވެ.

ދެ ދުވަހުގެ ދަތުރުގައި ބްލިންކެން އިނގިރޭސި ހާރިޖީ ވަޒީރު ޑޭވިޑް ލެމީއާ ބައްދަލުކުރައްވާނެއެވެ. މަޝްވަރާ ކުރައްވާ މައިގަނޑު ދެ މައްސަލައަކީ ޔޫކްރެއިނަށް އެހީތެރިވުމާއި ޣައްޒާގެ ހަނގުރާމަ ހުއްޓުމަކަށް ގެނައުމެވެ.

"މި ދަތުރުގައި އިނގިރޭސި ވިލާތުގެ އިސް އޮފިޝަލުންނާ ބްލިންކެން ބައްދަލުކުރައްވާނެ. އެއް ބޭނުމަކީ އެމެރިކާ އާއި އިނގިރޭސި ވިލާތާ ދެމެދު އޮތް 'ހާއްސަ ގުޅުން' އިތުރަށް ވަރުގަދަކުރުން،" އެމެރިކާގެ އޮފިޝަލަކު ވިދާޅުވިއެވެ.

މި ދަތުރުގައި އިނގިރޭސި ބޮޑު ވަޒީރު ކެއާ ސްޓާމާއާ ވެސް ބްލިންކެން ބައްދަލުކުރައްވާނެ ކަމަށް ބެލެވެއެވެ.

އިނގިރޭސި ވިލާތުގެ އޮފިޝަލުންނާ މަޝްވަރާކުރައްވާނެ އިތުރު ކަންތައްތަކުގެ ތެރޭގައި އިންޑޯ-ޕެސިފިކް ސަރަހައްދުގެ އަމާންކަމާއި އޭ.ޔޫ.ކޭ.ޔޫ.އެސް.ގެ ގުޅުންތައް ހަރުދަނާކުރުން ހިމެނެއެވެ. މި ޖަމާއަތަކީ އެމެރިކާ އާއި އިނގިރޭސި ވިލާތާއި އޮސްޓްރޭލިއާއިން މި ސަރަހައްދުގައި ސުލްހަ ގާއިމުކުރުމުގެ މަސައްކަތަށް އުފައްދައިފައިވާ ޖަމާއަތެކެވެ.

ޑޭވިޑްއާ ބްލިންކެން ފުރަތަމަ ބައްދަލުކުރެއްވީ މިދިޔަ ޖުލައި މަހު ސްޓާމާ އެމެރިކާއަށް ކުރެއްވި ދަތުރެއްގައެވެ. އެއީ އިނގިރޭސި ބޮޑު ވަޒީރުގެ ގޮތުން ސްޓާމާ ނޭޓޯ ޖަމާއަތުގެ އެންމެ އިސްވެރިންގެ ބައްދަލުވުމުގައި ބައިވެރިވެވަޑައިގަތުމަށެވެ. އެ ބައްދަލުކުރެއްވުމަށް ފަހު އެމެރިކާގެ ހާރިޖިއްޔާއިން ބުނީ ބްލިންކެން އާއި ޑޭވިޑް އެއްބަސްވެވަޑައިގަތީ އިނގިރޭސި ވިލާތުންނާއި އެމެރިކާއިން ޔޫކްރެއިންގެ އިގުތިސާދީ ރައްކާތެރިކަން ކަށަވަރުކުރުމާއެކު އިންސާނީ އެހީ ދޭނެ ކަމަށެވެ. އަމާޒަކީ ޔޫކްރެއިންގެ ސިޔާދަތާއި އިސްތިގުލާލު ރައްކާތެރިކުރުމެވެ.

މެދުއިރުމަތީގެ މައްސަލައިގައި ބްލިންކެން، ޑޭވިޑްއާ މަޝްވަރާ ކުރައްވާނީ ޣައްޒާގެ ހަނގުރާމަ ހުއްޓައިލުމުގެ އިތުރުން ހަމާސްއިން ރަހީނުކޮށްފައިވާ ޔަހޫދީން ދޫކޮށްލަދޭނެ ފަދަ "ޑީލެއް" ހެދުމާ ގުޅޭ ގޮތުންނެވެ.

"މެދުއިރުމަތީގައި ދިގު މުއްދަތަކަށް ސުލްހަ ދެމިގެންދާނެ ގޮތުގެ މަގެއް ގާއިމުކުރުން އަމާޒަކީ،" އެމެރިކާގެ އޮފިޝަލަކު ވިދާޅުވިއެވެ.

މިދިޔަ އަހަރުގެ އޮކްޓޫބަރު މަހުގެ ހަތް ވަނަ ދުވަހު ހަމާސްއިން ވަނީ ޔަހޫދީންގެ 1،200 އެއްހާ މީހުން މަރައިލައި، 250 އެއްހާ ޔަހޫދީން ރަހީނުކޮށްފައެވެ. މި ކަމާ ގުޅިގެން އިސްރާއީލުން ފެށި ޣައްޒާ ހަނގުރާމައިގައި ފަލަސްތީނުގެ 40،000 އަށްވުރެ ގިނަ ރައްޔިތުން އިސްރާއީލު ސިފައިން ވަނީ ޝަހީދުކޮށްލައިފައެވެ.

ވޭތުވެދިޔަ 10 މަސް ތެރޭގައި ބްލިންކެން ވަނީ 10 ފަހަރަށް އިސްރާއީލަށް ޒިޔާރަތްކުރައްވައިފައެވެ. އިސްރާއީލުގެ ބޮޑު ވަޒީރު ބުންޔާމީން ނަތަންޔާހޫއާއެކު އެންމެ ފަހުން ބޭއްވެވި ބައްދަލުކުރެއްވުމަށް ފަހު ބްލިންކެން ވިދާޅުވީ އެމެރިކާއިން ހުށަހަޅައިފައިވާ ސުލްހައިގެ މަގުޗާޓަށް ނަތަންޔާހޫ އެއްބަސްވެފައިވާ ކަމަށެވެ. ރަހީނުންގެ މައްސަލައިގައި އިސްރާއީލުގައި މިދިޔަ ހަފުތާގައި ފުޅާ ދާއިރާއެއްގައި ނަތަންޔާހޫއާ ދެކޮޅަށް ޔަހޫދީން ވަނީ މުޒާހަރާކޮށްފައެވެ.

ސްޓާމާ މި މަހު 13 ގައި އެމެރިކާއަށް ވަޑައިގަންނަވާނެ ކަމަށް އެމެރިކާގެ ރިޔާސީ ގަނޑުވަރު ވައިޓް ހައުސްއިން މިދިޔަ ހުކުރު ދުވަހު އިއުލާންކުރިއެވެ. ބޭނުމަކީ އެމެރިކާގެ ރައީސް ޖޯ ބައިޑެންއާ ދެވަނަ ފަހަރަށް ބައްދަލުކުރެއްވުމެވެ. ސްޓާމާ ފުރަތަމަ ފަހަރަށް ސީދާ ގޮތެއްގައި ބައިޑެންއާ ބައްދަލުކުރެއްވީ ޖުލައި މަހު އެމެރިކާގައި ބޭއްވި ނޭޓޯގެ އެންމެ އިސްވެރިންގެ ބައްދަލުކުރެއްވުމުގައެވެ. އެ ސަމިޓަށް ފަހު ސްޓާމާ ވިދާޅުވީ އެ ބައްދަލުކުރެއްވުމުގެ ބޭނުމަކީ ދެ ގައުމުގެ ދެމެދުގައި އޮތް "ހާއްސަ ގުޅުން" ހަރުދަނާކޮށް، ނޭޓޯގެ ގުޅުން ވެސް ވަރުގަދަ ކުރުން ކަމަށެވެ.

"އަންނަ ހަފުތާގެ ބައްދަލުކުރެއްވުމުގައި ސްޓާމާއި ބައިޑެން، ދެ ގައުމުގެ ޝައުގުވެރިކަން ހުރި ދުނިޔޭގެ މައްސަލަތަކާ ގުޅޭ ގޮތުން ފުޅާ ދާއިރާއެއްގައި މަޝްވަރާކުރައްވާނެ،" ވައިޓް ހައުސްގެ ނޫސްވެރިކަމާ ބެހޭ ސެކްރެޓެރީ ކަރީން ޖީން-ޕިއޭ ވިދާޅުވިއެވެ.

އޭނާ ވިދާޅުވީ ރަޝިއާއާ ދެކޮޅަށް އެކަށީގެންވާ އެހީއެއް ޔޫކްރެއިނަށް ދެއްވަން އެއްބަސްވެވަޑައިގަންނަވާނެ ކަމަށާއި ޣައްޒާގެ ހަނގުރާމަ ހުއްޓައިލައި، ޔަހޫދީ ރަހީނުން ދޫކޮށްލުމާ ގުޅޭ ގޮތުން އެއްބަސްވުމަކަށް ހަމާސް އާއި އިސްރާއީލު ގެނެވޭތޯ މަސައްކަތްކުރައްވާނެ ކަމަށެވެ.

"އެމެރިކާ އާއި އިނގިރޭސި ވިލާތާ ދެމެދު އޮންނަ 'ހާއްސަ ގުޅުން' ދެމެހެއްޓުމުގެ މުހިންމުކަމަށް ރައީސް ބައިޑެން ބައްލަވައިލައްވާނެ،" ވައިޓް ހައުސްއިން ބުންޏެވެ.

The post ޣައްޒާ، ޔޫކްރެއިން މަޝްވަރާއަށް ބްލިންކެން އިނގިރޭސި ވިލާތަށް first appeared on އަދިވެސް އޮންލައިން.