ތަސްވީރެއް ކިޔައިދޭ ވާހަކައެއް

އިވޭ އަޑުތަކުގެ ތެރެއިން އިވޭ އަޑެކެވެ. 'ތަސްވީރެއް އެއް ހާސް ވާހަކަ ކިޔައިދެއެވެ!'

މަތީގައިވާ ތަސްވީރުން އެ ފެންނަނީ 'އިސްކޫލެކެވެ!' ކޮންމެ ވެސް ދުވަސްވަރެއްގައި ކޮންމެ ވެސް ރަށެއްގައި ހުރި އިސްކޫލެކެވެ. މި ތަނުގައި އެ ދުވަސްވަރާއި އެ ރަށް ކަނޑައަޅައި ފާހަގަކުރުން މުހިއްމެއް ނޫނެވެ. މިތަނުގައި ފާހަގަކޮށްލަން ބޭނުން ވަނީ އެ ތަސްވީރު ކިޔައިދޭ 'އެއްހާސް އެތައް' ވާހަކައެއްގެ ތެރެއިން ވާހަކައެއް ނޫނީ ދެ ވާހަކައެވެ.

އެންމެ ފުރަތަމަ އެ ފެންނަ އިސްކޫލުގެ ބޭރުފުށެވެ. ބާވެ، ހަސްނެތި ވީރާނާވެފައެވެ. ޒަމާނުގެ ބަޅުވަޅީގެ އެޅުންތަކާއި ކެފުންތަކަށް ދޫކޮށްލެވިފައެވެ. އަޅާލާނެ އަތެއް، ކަމޭ ހިތާނެ ހިތެއް ނެތިއެވެ. އެހެންވެ، އެ އިސްކޫލުގައި ކިޔަވާ ކުދިން ތިބޭނީ މޫސުމުގެ ރަހުމު ކުރުމުގެ މައްޗަށް ދޫކޮށްލެވިފައިތާއެވެ. ދޭ އަތްވާއި ވެހޭ ވާރޭގެ ތެރޭގައި ނިވާކަމެއް ނެތިއެވެ. ޝައްކެއް ނެތް ގޮތުގައި، މި ފަދަ 'އިމާރާތަކަށް' ގަވާއިދުން ދާނޭ އެދުރުންނާއި ދަރިވަރުންނަށް ޚާއްސަ ހިއްވަރެއް ލިބެންޖެހެއެވެ. ވެއްޓެން ކައިރިވެފައިވާ އެ އިމާރާތަށް ވަންނާނޭ މީހަކު ނެތުމުން، އެ މީހުން ކުށްވެރި ނުކުރެވޭނެއެވެ.

ދެން، ޒަމާނުގެ ބަޅުވަޅީގެ ހެރުންތަކުގެ ސަބަބުން އެ 'އިސްކޫލު' ކަތިލެވި މަރުވާން ދޫކޮށްލެވިފައި އޮތުމުގެ މާނައަކީ ކޮބައި ހެއްޔެވެ؟ އިސްކޫލަށް އަހައްމިއްޔަތުކަމެއް ނުދެވޭ ކަމެވެ. އަޅާނުލެވޭ ކަމެވެ. ކިޔެވުމަކީ މުހިއްމު ކަމަކަށް ނުވުމެވެ.

ދެން، އޮތް ސުއާލަކީ މި ކަމުގައި މަސްއޫލުވާން ޖެހެނީ ކޮން ބައެއްތޯ އަހާލުމެވެ. އެއީ ކޮންމެ ބަޔަކަށް ވިޔަސް، އެ މީހުންގެ މަސްއޫލިއްޔަތު ފުރިހަމަ ގޮތުގައި އުފުލިފައި ނުވާކަން މި ތަސްވީރު ބުނެއެވެ. ހެކިވެއެވެ. އެފަދަ ބަޔަކު ބަތަލުންނަށް ވެދާނެ ހެއްޔެވެ؟ އެ ފަދަ ބަޔަކު ބަތަލުންނަށް ހަދައިގެން ވާހަކަދައްކާނީ ކޮން ކަހަލަ ރައްޔިތެއް ހެއްޔެވެ؟

The post ތަސްވީރެއް ކިޔައިދޭ ވާހަކައެއް first appeared on އަދިވެސް އޮންލައިން.