ހަނދާނުގެ މަންޒަރުން މިނުބައި ޖަރީމާ ފޮރުވިދާނޭތޯ
ތަދާ ވޭންތައް ހިތުގެ ޒަޚަމާ ދަވާއިން ފޮހެ ލެވޭނޭތޯ
ޣިޔާޘުއްދީނު ކަނޑުފައްތައި ޝަހީދުކުރުން ޖަރީމާއެއް
ނިޔާއިން އަދަބު ދޭންވާ ބޮޑު ކުށެއް ކަމުގައި ނުވާނޭތޯ
ޣިޔާޘުއްދީނު ޙައްޖަށްފަހު ވަޑައިގެންނެވި ހިނދުން ގައުމަށް
ރިޔާސަތު ފޭރިގަތުމަށް ކުޅަ ބަޣާވާތް ސިއްރުވާނޭތޯ
މުޙައްމަދު ފާށަނާކިލެގޭ ކިޔޭ ނުލަފާވި ބޮޑުޚާއިނު
ނުޙައްޤުން ރަސްކަމަށް އެރުމަށް، ރަދުން ބަރުބަނދެ ނުފައްތާތޯ
ރަދުންގެ ގެކޮޅު ތަޅާލާފައި ބިނާ "ކަޅުވަކަރު މިސްކިތް" ކޮށް
އަނދުން އަޅުވާން އެއީ ނަދުރެެއް ކަމަށް ބުނެގެން ފުދޭނޭތޯ
މުދާ ވާރުތަވެރީންނަށް ވެސް ނުދީ އަނިޔާގެ އަތް އިސްކޮށް
މުދާކޮޅު މިސްކިތެއް އެޅުމަށް ކަމަށް ބުނެފައި ނުފޭރޭތޯ
ޙަލާލު ނުވާ ނުޞައްޙަ މަގުން، އަރައިގަނެ ފޭރިގަތް މުދަލުން
ކަލާނގެ ވަޖުހު ފުޅަށްޓަކަޔޭ ކިޔައި މިސްކިތް އެޅޭނޭތޯ
ޢަޖާއިބަކީ އެކަން އެނގިހުރެ އެކަން ފޮރުވައި އުޅޭތީޔޭ
ނަޖާވެވި ނަރަކައިން ކުށްވެރި އަޅުން ދިނި މިންޖު ވާނޭތޯ
The post ޣިޔާޘުއްދީނު ރަދުން ޝަހީދުކުޅަ ބަޣާވާތުގެ ހަނދާން first appeared on އަދިވެސް އޮންލައިން.
